Aizawl September 20, 2023: Commerce & Industries Minster Dr. R. Lalthangliana, MIFCO Chairman ni bawk chuan vawiin khan Chhingchhip-a Mizoram Food and Allied Industries Corporation Ltd. (MIFCO) hmun a tlawh.

Minister Dr R Lalthangliana chuan Chhingchhipa MIFCO thei tui sawrna hmun Fruit Juice Concentrate Plant tlawhin helai hmun tih changtlun zel dan tura hmachhawp te thawktute a sawi pui a. Tuna an dinhmun leh hmalakna te a hmunah a hmuhpui. 

MIFCO thei tui sawrna hmunah hian Lakhuihthei leh Sapthei te leiin a tui an sawr thin a. Mipui hnena hralh chhuah turin Squash-ah an siam bawk thin a ni. Chhingchhip leh a chhehvel khua lo neitute thar chhuah lakhuihthei leh sapthei te hi lei khawm thin a ni a. He Fruit Juice Concentrate Plant atang hian squash hi ni khatah bottle 300 vel an siam thin a. Kum tin metric ton 10-15 vel zet chu Sikkim-ah an thawnchhuak thin a ni.