ZALEN August 11, 2025: Chief Minister Lalduhoma chuan vawiin khan a office-ah UD & PA official pawimawhte kawmin, Thenzawl Peace City Master Plan siamtu tur zawnna kalpui meka an thlen chinte a sawipui. 

Chief Minister hi Vanlaldina Fanai, Commissioner & Secretary to CM in a tawiawm. Lalmalsawma Pachuau, Secretary, UD & PA chuan July ni 22-a Master Plan siamtu tur zawnna hmahruai Request for Proposal for selection of Consultant an tihchhuah thu leh company lian tak tak sawm pariat ten an rawn ngaihven thu a tarlang a. Pre Bid Queries rawn nei zingah hian khawvel huapa company thate pawh an tel thu a tarlang.

Ruahman anga thil a kal chuan September thla tir hian a thawktu tur thlanna hi neih fel hman tum a ni a, October thla atangin hna an tan ang a, tun sawrkar kum chhungin Master Plan pawimawh zual chu peih fel hman an tum.

Tarlan thin tawh angin mipui nuaih 10 vel chen theihna tur khawpui changkang (Modern sustainable, inclusive & planned city), Thenzawl Peace City din tumin sawrkar chuan hma a la mek a. Ministry of Housing & Urban Affaira (MoHUA) chuan Master Plan siamna tur Rs. 10 crore a pe tawh a ni.