Aizawl: Mizoram chhung khaw mal khaia puantah dek chhuak hnem leh hralh hnem ber ‘Puantah Khua’ tia hriat lar Thenzawl khua a puantahtu za a 20 velte chuan Covid hri leng vangin eizawnna dang an dap tawh a, an sum deh chhuah pawhin kum dang a phak lo nasa dawn hle.

Thudawnna PC Zaliana chuan Covid-19 hri lengin Thenzawl a puantah a ti khaihlak nasa hle tih sawiin, “Covid-19 hri len hnuah Thenzawla puantahtu zaa 20 bawr velte chu puantah bansanin eizawnna dangah an peng,” tiin, “An puantah hlawh leh hralh na hmuh ang ang ni tin khawsak nana ring an thahnem a, puan hralhna a that loh chuan a tah man dawn nghal tur an nei lo va, chumi vang chuan pawisa an hmuh nghal theihna tur lama peng an tam a. Covid-19 hri len hma an phak lohna zat erawh mumal taka chhutchhuah hleih theih ala nilo,” tiin ZALEN a hrilh bawk a ni.

Thenzawla Industries department extension officer PC Zaliana hnen atanga ZALEN thudawn danin, Thenzawlah puantah khawl 1,791 leh puantahtu 1,854 chhin chhiah a ni a. 2019, January - June chhunga puan hralh tur an tah chhuah zat hlut zawng chu Rs. 9,16,39,800 niin kumtluanin Rs vbc. 15 chuang tling tura ngaih a ni.