Aizawl: Home Minister Lalchamliana chuan, "Thiamna a san poh leh ramin hma a sawn thin a ni," a ti.

Tuichangral Zirlai Pawl ten nimin Chanmari YMA Hall-a zirlai tharte lawmna (freshers social) leh zirlai tithate chawimawina hun a hmanpuina ah he thu hi sawiin Home Minister chuan, "Zirna hi mi puitlinga min siamtu, he khawvela kan damkhaw chhuah theihna tura kawng min kawhhmuhtu a ni," a ti a. Zirlai kalkhawmte chu fuihin mahni ke a ding thei tura hmalam thlir tur te, Mizoram sawrkar hnuai chauha hna dil lo a, Central sawrkar hnuaia hna tha tak tak awm te thawh tum turin a ti. 

Hrangturzo bialtu MLA ni bawk chuan Tuichangral Zirlai Pawl te nen an bial chhung zirna tihhmasawnna kawngah leh hmasawnna (development) hna thawh tha zawk leh chak zawka a kal theihnan hma an la ho thin tih a sawi a. Bial chhunga hmasawnna hna thawh te a tha tawk em tih uluk leh taima taka an vil thin chu lawmawm a tih thu a sawi. 

Zirlai ti tha te chawimawina hunah hian kum 2001 atanga 2022 chhunga pawl 10 atanga MA thleng result chhuaka hlawhtling te hnenah lawmpuina thuziak an hlan a. An bial chhunga mi hmingtha chawimawi tlak te chawimawina hun an hmang bawk. 

Tuichangral huam chhungah hian khaw 14 - Bawktlang, Biate, Chekawn, E.Lungdar, Hmunzawl, Khawlailung, Leng, Lungchhuan, Lungkawlh, Mualcheng, N.Vanlaiphai, Piler, Sailulak leh Sialsir khua te a awm a ni.