Aizawl: Chief Minister Zoramthanga chuan, “Thiamna inang reng pawh a hmangtu in a hman dan azira mi hlawhtling leh hlawhtling lo an awm a, thleng thui leh thui lo te inthlauhna a siam thin a ni,” a ti.

Tun hnai Commonwealth Games 2022-a Mizo medalist-te chawimawina hun, Zirtawpni zana Vanapa Hall-a neihah he thu hi sawiin chief minister chuan medalist-te pahnih a lawmpuina leh an hlawhtlinna chu ropui a tih thu a sawi a. Hlawhtlinna chang tura an beihna leh tumruhna leh an chhungte tawiawmna chu fakawm a ti a. Chief minister chuan mahni chawr chhuana chhungkaw khawsak san leh san loh chu hlawhtlinna leh thlen chin hriltu a nih vek loh thu a sawi.

Mihringte hi thiamna leh theihna neia siam vek an nih dan te, thiamna inang reng pawh a hmangtuin a hman dan azira mi hlawhtling leh tling lo, thleng thui leh thui lote inthlauhna a siam thin thu a sawi a. Nih theih thleng tur chuan tumruhna nen theihtawp chhuaha theihna nei a ni tih inhre chunga ke pen a pawimawh thu te a sawi a ni.

Khual zahawm Home Minister Lalchamliana pawhin he hunah hian thu sawiin, sports ah thlen san leh ram hmasawnna hi kal kawp a nih thu a sawi a. Tun tuma Mizo medalist te pahnih chu an thalaipuite tana entawn tlak an nih thu a sawi a. Infiamna chauh nilo, khawvel nun kawngah hian hlawhtling turin thil tam tak a awmlo tih sawiin tumruhna, in pek zawhna, nghah peihna, mahni inthununna te hi hlawhtlinna kawngah min kaihruai tu a ni, a ti a. Thalai kawlkhawmte chu an tun hun hmang tha a, an nakin hun tur atan tun atanga inbuatsaih sauh sauh turin a chah a ni.

Sports & Youth Services Minister Robert Romawia Royte, program thlengtu chuan Mizoram sawrkarin sports chawisan ngaipawimawhin, thalaite mamawh phuhrukna tur theih ang ang hmasawnna ruhrel din kawngah leh kawng danga theihtawp chhuah a nih thu a sawi a. Medalist te pahnih chawimawina zanin a pek chu an thlen chin tur an thlen tawh vang ni lovin, hma an sawn belh zel theihna tura hualna a nih thu a sawi a. Hetia cash award pek chungchangah hian Mizoram sawrkar chuan kalphung mumal tam a siam chhoh zel dan te, incentive scheme pawh a changtlun zawk nan a ennawn a nih dan te a sawi a. 

Commonwealth Games 2022 Birmingham a kumin a neih zawh takah India ram aiawh a kal zinga Mizo medalist pahnih Weightlifting 67 kg ah Jeremy Lalrinnunga chuan Gold Medal a dawng a, Lalremsiami chuan Women's Hockey ah Bronze Medal a dawng a ni. Gold medal dawngtu Jeremy Lalrinnunga hi Mizoram sawrkar chuan cheng nuai 25 a pe a. Bronze Medal la tu Lalremsiami hi cheng nuai 7.5 a pe bawk a ni. 

Medalist te chawimawina hunah hian Bronze Medalist Lalremsiami, Hockey Player chuan a thalai pui ten a thlen aia sang zawk pawh an thleng thei a, infiamna khawvelah hian remchanna kan neih phawt chuan khawvel huapah chungnung takin a awm theih thu sawiin a thalaipuite a fuih a. Gold medalist Jeremy Lalrinnunga, Weightlifter chuan infiamna lamah kan kal emaw, zirna lamah a ni emaw hlawhtling tur chuan tum ah chian a pawimawh thu sawiin, midangin an tih ve vang ringawt lovin mahni tan bei zawkin, thawhrim piah lamah mahni invawn a pawimawh a tih thu te a sawi bawk.