Aizawl: Nimin khan Champhai North bialtu MLA Dr. ZR Thiamsanga chuan Champhai District Hospital hman turin Mizoram Teachers Federation (MTF) te thawh Ambulance chu District Medical Superintendent Dr. Zatluanga hnenah chahbi pe in a hlan.

Ambulance hlan puala inkhawm neihah thu sawiin Dr. ZR Thiamsanga chuan Mizoram hmun hrang hranga Covid-19 dona tura in-volunteer zawng zawngte chhuan-awm a tih thu sawiin, CM Zoramthanga kaihhruaiin theihtawp chhuah avanga India rama ti tha ber kan ni thei leh Health Minister hmalaknaa a Covid-19 do hna chak taka kalpui a ni chu entawntlak hle a a hriat thu a sawi a. Champhai hmunah Mini RT- PCR an tih mai Truenat Quatro din thei tura hmalak anih thu leh endiktu ten endik hna an zawh tawh thu a sawi a, an thil hmuh leh hriat angte sawrkara thlena thurawn an pek dawn thu sawiin, "Tun atanga hun reiloteah Covid-19 mai bakak natna dang Hepatitis, Typhoid, TB, Malaria leh a dangte thlenga finfiah thei khawl bunfel tum a ni," a ti a.

"Covid dona kawnga thawktu hrang hrangte thahnemngaihna leh thawhhona tha tak avangin natna khuahkhirh a ni rih a, Community spread pawh a awm lo a ni," a ti bawk a. Ral hmatawnga ding, hrehawm pawisa loa thawhktute avangin tiang dinhmun hi kan thleng a, thawktu a te ber atanga a lian ber te ram leh hnam tana an inpekna chu ngaihsanawm a tih thu a sawi bawk.

Dr. Thiamsanga chuan Health department hmalakna atan CM in cheng nuai 2100 chuang phal taka a pek tawh thu leh Health Minister kaihhruai hnuaiah chak taka hmalak zel a nih thu a sawi a. "Truenat Quatro khawl bun tum chuan nikhatah sample 40-48 a en thei dawn a, Covid-19 natna mai bakah Hepatitis, TB, Typhoid, Malaria leh a dangte chenin a finfiah theih dawn avangin district tan a chhenfakawm hle dawn a ni," a ti a. Biosafety Cabinet order tawh ani a, Mini RT PCR Truenat Quatro chu Champhaiah bunfel thuai tum niin, MLA ten theihtawp chhuaha an tanho zel tur thu a sawi bawk.

Champhaia Truenat Quatro bunfelna tura hmun ruat, Dental OPD tura sak building hrang hlak chu sawrkar tirh Expert Team Member Dr. H.Lalhlenmawia, HoD, Dept of Pharmacy, RIPANS, Zemabawk, Dr. Vanramliana, Asst Professor, Dept of Zoology, PUC leh Dr. Krossnunpuii, Microbiologist, District TB Centre (DTC), Aizawlte chuan an enfiah nghal a ni.
Ambulance inhlanna hun hi Champhai Bawrhsap Maria C.T Zuali chuan a kaihruai a. Dr. Zatluanga, DMS chuan lawmthu sawina hun hmangin a khar a ni.