September 22, 2022; Mizoramah kum 1985 atanga nikum 2021 inkar chhung khan nau piang 7,13,508 leh mitthi 1,67,002 chhinchhiah an awm a, kum 2021 a mitthi chhinchhiah zingah kum 70 chunglam (70 and above) an tam ber. Kum hmasa lam nen a khaikhinin, nikum a mitthi punna a sang hle.

Economic & Statistics department buatsaih, nimin a tlangzarh, Annual Report of Registration of Births & Deaths, Mizoram, 2021 a tarlan a nih danin, nikum chhunga mitthi chhinchhiah mi 8,101 zingah kum 70 chunglam mi 2,663 an awm a, kum 55-64 inkar mi 1,169 awm bawkin, kum 35-44 inkar mi 1,094, kum 45-54 inkar mi 1,052, kum 25-34 inkar mi 624, kum 65-69 inkar mi 569, kum 1 hnuailam mi 44, kum 1-4 mi 94, kum 5-14 mi 128, kum 15-24 inkar mi 252 an awm. Mitthi chhinchhiah zawng zawng zinga 5,156 te chu mipa niin, midang 2,945 te chu hmeichhia an ni.

Kum 1985 atanga nikum 2021 inkar chhung khan Mizoramah nau piang chhinchhiah mi 7,13,508 an awm a, hemi hun chhung a nau piang tam ber kum chu 2012 niin, 26,042 nau piang chhinchhiah an awm a, hemi kum hian mitthi chhinchhiah 6,503 an awm thung.

Hetihlai hian kum 1985-2021 chhung a mitthi chhinchhiah zat chu mi 1,67,002 an tling a, hemi hun chhung a mitthi chhinchhiah tam ber kum chu, 2021 kha niin, mi 8,101 mitthi chhinchhiah an awm a, kum hmasa aia mitthi chhinchhiah tamna chu 1,398 a tling.