Aizawl: Mizorama blood bank lian ber leh mipuiin pek an tam, Aizawl Civil Hospital-ah chuan kum dang aiin thisen pek a tlem zawk a; mahse, heti chung hian harsatna lian erawh an tawk lo thung. ACH-a thisen lakte hi a zatve vel chu private damdawi inah pek chhuah leh thin a ni.

Aizawl Civil Hospital-a blood bank officer Dr. K.Rothangpuia chuan thisen pangngaiah chuan harsatna tawk lo mah se, thisen var erawh duhkhawp an nei thei lo tih Zalen a hrilh a. “Lockdown avangin kum dang ai chuan thisen pe hi an tlem zawk a; mahse, hetih rual hian mamawhna a tlem ve tho avangin buai chhe lutuk lovin kan awm a. Thisen pangngai hi chu ni 35 a dah that theih avangin stock kan nei tha a; mahse, thisen var hi chu ni 5 chauh a dah that theih avangin siam teuh pawh ni ila paih leh a ngai dawn a. Thisen var hi chu a tharlâm zel a ngaih avangin indaih tak tak a har a ni,” a ti.

Aizawl Civil Hospital-ah thisen pe tam mah se, private damdawi inten an rin ve avangin thisen stock chu a tam tak tak thei lo tih sawiin, “Aizawl khawpui chhunga private damdawi inte hian kan hnen atangin thisen hi an la chhawng veleh a, hei mai bakah Cancer Hospital leh ZMC-ten min rinpui avangin kan duhthusamin kan ngah thei lo a. Aizawl Civil Hospital-a thisen awm zinga a zatve chuang hi kan pe chhuak veleh thin a ni,” a ti a. Private damdawi inte tan hian thisen unit khat zelah a sawngbawlna man (processing fee) Rs. 550 zel an la tih sawiin hei bak chu engmah sum lak an nei lo niin a sawi.

Dr. K.Rothangpuia chuan kum dang aiin a thlawna thisen pe an tlem zawk tih Zalen hrilhin, “Covid-19 avang hian tum danga blood donation camp huaihawt ang kha a rem lohna chin a awm a, chubakah lockdown tan tirh lai vel khan camp nei tura ruahmanna kan siam tam tak pawh cancel a ni a. hei mai bakah thawktu lam kan indaih loh avangin ni dang angin blood donation camp hi kan huaihawt tam thei lo a ni,” a ti a.

Private damdawi inten thawktu lamah tanpui an tum nia an hriat thu sawiin hei hi an tih theih chuan thawktu pawh an indaih deuh dawn niin a sawi bawk.

Civil hospital-in thisen an lak zawng zawng chu damlote hnenah an pe vek lo nia sawiin Dr. K.Rothangpuia chuan, “Thisen kan lakte reng reng hi natna chi 5- HIV, VD, Malaria, Hepatitis ‘B’ leh ‘C’ te kan test ngei ngei thin a, heng kan test zinga natna eng emaw kai/vei an awm chuan kan paih leh mai thin a. Chuvangin, thisen kan lak tam ngaihtuahin damlo mamawhte hnena kan pek chhuah hi a tlem zawk a ni,” a ti.

Damlote chuan thisen an hman chu rul leh thei zel se an duhthusam ni mah se rul thei lo tam tak an awm bakah mi tam tak chu a thlawna thisen an pek avangin duh angin thisen neih khawl a harsa tih a sawi a. “Damlo kan pekte hian rul thei zel se chuan harsatna kan tawk loin a rinawm,” a ti bawk.

Aizawl civil hospital-ah hian kum 2019 hmalam kha chuan thisen latu ten a man an chawi a ngai thin a; mahse, MNF ministry in thisen sawngbawlna man lak loh tur a tih atangin thisen pek chhuah hi nasa takin a pung a. Kum 2017-ah unit 2200, 2018-ah 2552-te pek chhuah a nih laiin kum 2019-ah chuan unit 15039 leh 2020 October thla tawp thleng khan unit 12411 pek chhuah a ni tawh. Civil hospital blood bank hian private damdawi inte tan kum 2017-ah thisen unit 12610, 2018-ah unit 12563 leh 2019-ah unit 11467 an pe chhuak a ni.