Aizawl: Mizoramah tun hnai thla 15 chhungin kangmei vanga nunna chân mi 15 an awm a. Rs 24,92,56,113 hu bungraw kang chhia a awm a. Kum 2022 chu tun hnai kum 12 chhunga kangmei vanga thi tam ber kum a ni.

Fire & Emergency Services department (F&ES) hotute hnen atanga ZALEN thudawn danin nikum chhung khan vawi 128 kangmei chhuak chhinchhiah a ni a, in kang 34 awmin, ram kang 44 leh kangmei chhuak dang 50 a awm.

Fire Station awmlohna khua - Rungdil, Suangpuilawn thlam March 13, 2022-a kangah mi pathum an thi a. Nikum chhunga kangmei chhuak atanga bungraw kang chhia hlut zawng chu Rs. 23,69,08,000 niin, kangmei vanga nunna chan mi 15 an awm a. 

Kumin (March thleng)-ah kangmei chhuak 127 chhinchhiah ni tawhin, in kang panga, ram kang 97 leh kangmei chhuak dang 25 a awm.

Kumin chhunga kangmei chhuak vanga bungraw kang chhe hlut zawng chu Rs. 1,23,48,113 a ni.

F&ES chhinchhiah danin kum 2013 atanga kumin 2023 chhungin kangmei vanga nunna chân mi 46 an awm a, hemi hun chhunga kangmei vanga nunna chân tam ber kum chu kum liam ta kha a ni.