Boxing ngaina lem lo pawhin hmuhnawm an tih LPS Professional Fight chu thla thar August ni 31, 2022 hian buatsaih a ni dawn. Weight hrang pangaah a duh apiang tel theih a ni ang. 

Covid 9 hripui leng vangin kum thum zet chawh a nih hnuah LPS Promotional Fight chu neih leh tum a ni. LPS Pro Fight avang hian Mizo boxer-te boxing amah tangharh tharin an khelhna huang zauhin professional kawng an zawh chhunzawm nasa hle a ni.

Kum 2009 atanga 2019 chhunga LPS Promotional Fight vawi riat buatsaih tawh kha tidanglamin professional dan hnuaiah an inhnek dawn a, huam zau zawka talent hai chhuah leh professional boxing khel tawhten hnuhma tha an neih belh theih nan LPS Professional Fight tiin a hming thlak a ni.

Pro Fight tharah hian Mizo boxer-te tel tamna weight panga - fly (kg 48-52), bantam (kg 52-55.3), feather (kg 55.3-59), light (kg 59-63.5) leh welter (kg 63.5-70) huangah title an inchuh dawn. A hluiah weight panga tho awm mah se middle leh lightheavy tel zui lovin feather leh welter dah a ni ve thung.

Weight tina champion-in lawmman pawisa fai Rs 50,000 dawngin pahnihnain Rs 20,000, semifinal-a tlain Rs 10,000 leh quarterfinal-a tla hnenah Rs 5,000 theuh pek a ni dawn a, a vaiin weight hrang pangaah lawmman pawisa fai Rs 5,50,000 sem chhuah a ni ang.

Weight tinah semifinal atangin inhnek zawng zawng khawvel puma professional boxing record chhinchhiahna boxrec-ah ziah luh vek tur a ni a; Pro Fight champion hian boxrec record-ah chak vawi hnih a nei thei dawn a, a kal zelna tura hnuhma hlu leh pawimawh tak a ni ang.

Weight tina champion-ten WBC India title an chuh zui theihna kawng dap a ni dawn bawk a, Pro Fight buatsaihtute chuan thil harsat lo leh tih theih mai tur niin an sawi.

Mizoram mai ni lovin state dang atang pawhin mahni sensoa tel duh tan kawng hawn vek a ni a. Professional boxing khel tawh leh mi thar, amatuer chauh la khelte pawh a huam vek a, chutih rualin fixture siam hunah tawn hriat nei leh mi thar erawh thliar an ni ang.