Aizawl April 7, 2024 : Mizoramah kumin thla thum, January - March chhungin ruihhlo (heroin) vanga thi mi 12 an awm a. Hemi hun chhung veka heroin an man zat chu kg. 18.570 a tling.

Excise & Narcotics Department (END) chhinchhiah danin Mizoramah kumin April 2 thleng khan ruihhlo vanga thi mipa 10 leh hmeichhia pahnih an awm tawh a, an vaiin heroin leh damdawi dang tihpawlh vanga thi an ni.

Nikum 2023 chhung khan heroin vanga thi mi 76 an awm a, chung mite chu mipa 64 leh hmeichhia 12 an ni.

Kum 1984 atanga chhutin Mizoramah ruihhlo vanga thi mi 1,822 an awm tawh a, chung mite chu mipa 1,601 leh hmeichhia 221 an ni.

END chuan kumin 2024-a thla thum, January 1 - March 31 inkar khan heroin kg. 18.570 an man a, rakzu litre 16,829.035 leh sapzu litre 4,127.085 an man tawh bawk.

Heng bakah hian zu bilh lai tin 31,064, BEDC (Burma zu) litre 508.700, beer litre 3,180.500 (um/bur 6,345), ganja kg. 381.076, methamphetamine kg. 106.648 leh khuh damdawi phial 4,739 tun thla thum liam ta chhungin an man tawh bawk.