Aizawl: Nimin khan Commerce & Industries Director J. Hmingthanmawia kaihhruaina in tunlaia Aizawl leh a chhehvela thlai thar man to ta lutuk chung-chang sawiho a ni a, Commerce & Industries hotute, Horticulture, Mizoram Consumers Union hruaitute leh thlai thar kharchhawngtute he hunah hian an tel.

Meeting ah hian Vairengte kawng a tlang loh chhung leh lockdown avanga Mizoram chhung thar chhuah thlai thar man a to chhoh dan te huam zau takin sawiho a ni a, Meeting kaihhruaitu Commerce & Industries Director chuan kan state in harsatna a tawh chhoh mek lai hian remchanga la a, mipuite tana phurrit siam a, thlai thar man lo ti to lo turin thlai thar zuartute leh kharchhawngte a ngen a, hetih rual hian thlai thar zuartute leh kharchhawngte pawhin harsatna an tawhte sawi langin diesel/petrol van avanga motor hire na a to thu leh lo neitute pawhin an thlai man ti to bik lo se an duh thu an sawi bawk.

Ngun taka sawiho hnu in Serchhip District a thlai tharchhuahte mumal zawka a hralh dan tur lo enfel pui turin Divisional Hoticulture Officer, Serchhip ruat a ni a, Sihphir chhehvela thar chhuahte a hralhna tur kawng tha zawk lo enfel pui turin DHO, Aizawl leh Commerce & Industries hotute leh MCU hruaitute ruat an ni a, Tuipui tharchhuah Tomato te man tlawm zawka mipuite hnen a thlen theih dan tur lo zawng turin DHO Khawzawl ngen a ni bawk.