He thlai tangkai tak hi a chin dan leh seng dan te Isaia 28:27 hian a lo sawi a. Bible hun lai pawh hian an hmang tangkai tawh niin a lang. Jira hi Mizo tawngin kan sawi dan chiah ka hre lo va, tuna kan article atan chuan Jira tiin kan sawi mai ang a. Thil hlui chhui mite chuan Jira hi kum 5000 vel atanga lo hriat tawh ni awmin an sawi a. Hmanlai Greek leh Rome mi te chuan chawhmeh tihtui nan leh damdawi atan an hmang tawh tih hriatna a awm. India ram mite pawhin chawhmeh kanna atan an masala hmanah a bulpui tumtu a ni. Chawhmeh tihrimtui nan a tangkai bakah hriselna atan a tangkaina hrang hrang Science lam hian an tarlang a. Chungte chu han sawi ila: Chaw kawng sawngbawlna (digestion) a tichak thei: Science lam atanga kan ei leh inte zinga hriselna atana tha chhui mi te, George Mateljan Foundation antihte chhuinaah chuan Jira hian kan chawei thialsawm that theihna tura pawimawh tak, pancreatic enzymes a siam tamtir tih an tarlang. Tin, bile an tih, kan chaw thial sawmna atana pawimawh tak a chhuah tamtir an ti bawk. Mineral chi khat - iron a ngah: Iron hi kan thisena awm, hemoglobin leh oxygen nen an inpawlhin a kan thisen rawng sen pektirtu a ni. Iron tlakchhamna hi ram hausa ramah pawh hian a tam em em a. Jira thirfiante khat lek hian kan iron mamawh zaa 20 (20%) a phuhruk thei. Iron hi naupang thanglai tan a pawimawh zual a. Tin, hmeichhiaten an thi neih laiin thisen an hlauh nasat thin avangin iron an tlachham thei a.   Thisena cholesterol tan a tangkai: Enchhinna pakhatah chuan Jira rawtdip ni khatah 75mg vawi hnih chawlhkar riat (8) chhung an pek te zingah an thisena cholesterol thalo, LDL antih hi za zela 10 (10%) in a tlak hniam rualin an cholesterol tha HDL kha a ti sang sawt tih an hmu a ni. Heta enchhintuten an sawi chu Jira hian cholesterol tan a tangkai a ni tih chu a chiang a; mahse, hetia chawhmeha kan telh hian a tangkaipui angem tih hi zawhna lian tak a ni, tih an tarlang.   Zunthlum atan a tangkaina: Jira hi an enchhinnaah pakhatah chuan, kan thisena thlum tam lutuk tur control-tu hormore adiponectin an tih hi a chhuah tamtir niin an sawi. Zunthlum atana tangkaipui tak tak turin  Jira hi engzat chiah nge ei ngai tih an la chiang lo niin an sawi.   Jira tangkaina, mi thiamte sawi hi a rinawm tawk hle a. Chawhmeh a tih rimtui bakah tangkaina hrang hrang aneih avang hian chawhmeh i kan apiangin tam tawkin i lo telh thin dawn nia.