Aizawl August 24, 2022 : Vawiin khan MZP buatsaih Thu leh Hla kutpui ni hnihna chu hman a ni a, MAL Book of the Year dawng tawh te chawimawina hun leh ziaktute kawmna hun hman a ni bawk a, Chief Minister leh Sports minister Robert Romawia Royte ten heng hun hi an hman pui. 

MAL Book of the Year dawng tawhte chawimawina hun hmanpuitu Chief Minister Zoramthanga  chuan, "Thu leh Hla hi hnam anga min dinchhuah tirtu a ni. Kan ti hausain kan ti hmasawn zel tur a ni. Mizo tawng hi tawng har tak a ni a, chutih laiin kan chhehvel kan unaute tawng hrang hrang luankhawmna leh inchhunkhawmna a ni a. Zofate min phuarkhawmtu a ni," a ti. 

Chief Minister chuan, "Pathianin Zofate kan insuihkhawm nan leh kan inpumkhat nan Mizo tawng min dinchhuah sak a. Hma a sawn nasa hle a, chumi atan chuan mawh kan phur theuh a ni," a bawk. 

Zoramthanga chuan, Hnam chuangchang sawiin, "Mizo hnam hi a neitu bik kan awm lo a, chipeng hrang hrang inzawmkhawm in kan hnam hi a siam a. A inti neitu apiang a neitu kan ni mai" a ti. 

Robert Romawia Royte Sports Minister chuan Ziaktute kawmna hun a hman pui a, Khuallian chuan, "Ram leh Hnam venhimna leh vawnhimna atana hmanraw pawimawh em em chu thu leh hla a ni a, Hnam chanchin vawnghimtu a ni," a ti. 

"Lehkhabu chhiar hi kan uar thar a ngai, hnam puitlinna kawng a nih avangin uar sauh sauh ula. Thalaiten lehkha chhiar leh lehkhabu thar hriat hi a changkang a ni tih i hre thar ang u. Ziak ngeia dah lehkhabu hi a rintlak a, hriatna lak nana hmanraw pawimawh ber a ni," a ti bawk. 

Thu leh hla kutpui kharna hunah hian MZP President Lalnunmawia Pautu chuan, "Zirlaiten ngaihsan tur dik kan ngaihsan theih nan te, kan ziaktute ngaihsanna chang kan hriat theih nan te, kan thu leh hla humhalh nan leh lehkhabu chhiar kan uar thar lehzual nan hetiang hun buatsaih kan ni," a ti. 

Chawhma hunah, ziaktu hrang hrang; B. Vanlalzari, C. Lalnunchanga, Prof. RL. Thanmawia leh B. Lalthangliana te kawmna hun hman a ni a. Chawhnu lamah MAL Book of the Year 1989 atanga 2021 thlenga dawng tawhte chawimawina thuziak hlan an ni.