November 3, 2022; Land Owners' Association (Vairengte-Kawnpui Package 3-6 NH 06 & 306) chuan NH kawngpui zauhna atana an ram lakah zangnadawmna pe thuai tura sawrkar kar nan tukin dar 6 atang khan Vairengte leh Aizawl inkar kawngpui chu Vairengte daiah an dang.

Land Owners' Association hruaitute leh Vairengte police checkgate atanga ZALEN thudawn danin, tukin atanga kawngpui danah hian boruak duhawmlo thleng a awm lo a, Mizoram atanga state pawn a chhuak turte chu an tlang thei a, Mizoram rawn lut tur erawh phal chin an siam bak rawn lut a awm lo. He thu ziahlai vawiin tlailam thlengin Vairengte police checkgate ah Mizoram rawn luh tum bungrua (gas etc.) phur lirthei 4 a tangkhang mek.

Tukin lam khan khualzin phur Capital travel bus chu duty ten an lo dang a, passenger zinga Mizo engemawzahte leh hnamdang Mizoram rawn luh tum te chu Vairengte atangin lirthei dang hmanga tlang tir an ni. He thu ziahlai vawiin tlai lam thlengin khualzin tangkhang an awm hriat a ni lo.

National Highway No. 306 kawngpui laih zauhin a tihchhiat tur ram neitu intelkhawm, chhungkaw 1,786 te chuan zangnadawmna an dawn tur pek ngiatin tunhnai khan kawng an lo zawh tawh a, chumi hnuah October ni 24, 2022 ah Vairengte ah kawngpui dan an lo tum tawh bawk. 

Vairengte a Land Owners' Association hruaitute chuan kawngpui an dan tur chungchang chu Cachar news paper thenkhatah te an chhuahtir bakah, Cachar Truck driver Association ah te hriattirna an pe vek a, Cachar area chhung police station ah te information an pek thu an sawi.