DOWNLOAD OUR APP

Read latest news on your phone
app-store

TINRENG : CADS-in hma la mek

Sep 18, 2022

Central YMA-in ruihhlo do tura a din, Central Anti Drugs Squad (CADS) chuan September 9, 2022 atang khan hna an thawk tan a. Zirtawpni tlai thleng khan heroin hawng 95, tictac bur 351, methamphetamine mum 10,153 leh Alprozolam tablet 326 an man tawh.

Central YMA-in ruihhlo do tura a din, Central Anti Drugs Squad (CADS) chuan September 9, 2022 atang khan hna an thawk tan a. Zirtawpni tlai thleng khan heroin hawng 95, tictac bur 351, methamphetamine mum 10,153 leh Alprozolam tablet 326 an man tawh.

ZALEN-in CADS hotute a kawmna ah tun laia ruihhlo chu Myanmar atanga lo kal leh Zokhawthar atanga lo kal an ni thin tih sawiin ni danga Bagha lam atanga lo chho thin ang kha chu a awm hrih lo tih an sawi a. “Drugs ti mek hi an tam em em a. Heroin zuar zingah damdawi ti miah lo an awm laiin a tam zawk hi chu zuar chunga ti an ni tlangpuiin kan hria,” an ti.

Heroin chu a man a tlawm nia sawiin, “Tun lai hian hawng khat Rs. 23,000 vel niin kan hria a; mahse, hma kan lak hnu hian a vang tan a, a man pawh a to tan niin kan hria,” an ti bawk.

CADS member-ten hma an lak dan sawiin, “Chhun dar 12 velah office kan hawng tan thin a. Hmalak tur kan neih dan azirin kan che chhuak thin a. A chang chuan tlaivara kan duty chang a awm a, zing lamah pawh um zui kan nei a. Duty tur hi felfai takin kan ruat thin a ni,” tiin CADS Secretary Lalsawma Ralte chuan Zalen a hrilh.

CADS Secretary chuan lirthei pakhat chauh an nei chuan an hmalakna kawngah harsatna a thlen nia sawiin, “Kan duhna hmuna kal zung zung turin lirthei pakhat chauh kan nei hian harsatna min thlen a. Mahse, mi thahnemngaiten lirthei pakhat min pek an tum a, motor hi kan neih hunah chuan chak lehzuala hna kan thawh theih kan beisei a. Home-ah leh camping-ah hnawh luh zung zung theih tawh kan beisei a ni,” a ti a. Heroin zuar liantham deuh mi pakhat chu police kutah leh mi dang pali chu excise kutah an hlan tawh tih a sawi bawk.

Drugs mamawh tihtlem kawngah pawh Central YMA chuan hma an la tih sawi bawkin Lalsawma Ralte chuan, “YMA CEC-a kohhran upa ordained-te chu Demand Reduction Service tia dinin anni hian kan mi mante hi counselling an neihpui thin dawn a ni,” a ti bawk.

CADS hruaitute chuan Mizoram Chemist & Druggist Association ten an mamawh damdawi thahnem tak an pek avang leh mi tlawmngai eng emaw zatin tanpuina an pek avangin lawmthu an sawi bawk.

Share now