-Shillongpari, Thuampui

Aizawl hmun laili taka kum 100 chuang zet lo inbuh tawh chu an chhuak ta duak mai a. Anmahni hmethriat leh chhung leh khat leh thian neiin ngaih tur tumah ka nei chuang lem lo va.

Kan naupan lai (han ti ve khanglang i la) ka hre chhuak uai uai a, kan naupan lsi hunah kka chuan tunlai angin TV, Mobile phone, Youtube, tih te chu vana rah ang vang vang a la ni a, hmuhnawm leh en tur thlir tur dang awn ta lo chu Assam Rifles khan Cinema Hall an siam a. (Tun thlengin a Hall chu a la awm nghe nghe), an film chhuah kha Vai film ani deuh ber a, a hmuhnawm emaw, hmunawm loh emaw, kan en chak em em thin.

Khang hun lai khan naupang en man (Real frot) kha siki (0.25 Ps) a ni a, khung hun lai khan Assam Rifles choka rawngbawina tur thing tum Bedford Trip khat Rs. 170/- lek a la ni. Siki pawh kha nei kan awm ngai lo. Assam Rifles ho lah chuan Ticket nei lova luh kha naupang pawh ni se an phal der baw si lo va. Thian pahnih thumin kan han thawh khawn a, kan thianho daih kan thawh khawm hleithei lo ta thìn a, a fing deuhin tih dan tur an han rel a, a hmasaa lut tur an rel a, Internal-ah an lo chhuak ang a, a ticket bung khan la lut lo kan lut ve leh ang. Assam Rifle zingah pawisa nei ngai lo hre thei deuh an duty a nih phei chuan kan thinur thei em em a, en lo chuan kan haw em bik lo thung.

Ram buai hma kha chuan kan Mizo tlangval te hian an ngam em em a, an veng hming sawi lo i la, tlangval sual huai deuhte phei kha chuan an vel hial thin. An ram chin kawng sirah thirban 10 ft. vela sang hi a khat tawkin an phun a, chu chu street light awmchhun a ni bawk.

Puja kha an ngai hluin an tiropui thei em em a, an Vai lamte kan en thin a. Khang hun lai kha chuan an sual lo, thian tak tak an ni a, an tam lo bawk. An Puja pathian (Bawrhsap Tuikhur tuna Tennis court ni ta-ah sawn) kawng an zawh kualpio hnuah an paih thin a, kawng zawhnnah hian sweet te, balhla te, eng eng emaw an vawr a, kan inchuh luai luai thin. Khang hun lai kha chuan an pathian ban sawm nei kha Assam Rifles khan an ti ropuiin an uar em em a, naupang pawhin kan zui nasa thin. 

Assam Rifles khan Puja kha an ti ropui em em a, Vai lam thíam tak tak (an chah chhuak ni ngei tur a ni) an lam a, Vai lamho ngûnte kha kan awt em em thin a, kan thian hmeichhe pakhatin, "Ngun hi ban khata bun turin han nei i la aw.." a ti vawng vawng a, khang hun lai khan Assam Rifles Puja Vainu lam ngun kha kan ngaisang em em thin. Tun thleng hian ngun hi ka ngainat phah hial.

Assam Rifles an han chhuak ta daih mai ki a reh ruih mai a, khua an ti har ve khawp mai. Changkannain a ken tel a ni a, kum 100 chuang zet an lo enkawl,a, han danglam ta mai tur hi a lunglenthlak a, kan changkanain a ken tel thil hluite a thara thlak dan rual lohin a ngai ta si a, mi thiamte leh roreltu ten fel leh tha takin an rawn duang ang a, hmun nuam leh tha tak ni chho zel turin beisei i la. 

Ram buai hlim kha chuan buai hmaa kan hlauh loh aia a let tam takin min diriam a, a zawna kal tlangte kha kan hlau a, Laipui te kha, "Kawk suh. Kawh chuan an chhinchhiah zel a, an man dawn," an ti a, kan hlau em em thin. Kha chen kha an awm a, (kum 115 vel) tum khat kan intih buai a, thih phahte kan awm nghe nghe kha. Kha bak kha buaina lian tham (Ka hre sual thei tho) a awm ka hre lo. 

Kan ram Ieh ham tana an lo thawhah that lawmthu ka sawi a, an awmna hmun apiangah mite tana malsawmna ni zel se. Assam Rifle Bye Bye.