~ Joseph L Ralte

Kan kal dan phung pangngai sawhsawn hi a har kan ti a. Chu ngaihdan chuan Mizote rilru a luah hneh a. Sawrkar-ah leh tlawmngai pawl-ah kal dan phung thlakthleng min tihharsat phah hle ni hian a hriat. Tu’n emaw chuan nasa takin thil tha tur a ngaihtuah a. Ngaihdan thar leh tunhmaa la tih ngai loh tih atana tha engemaw a hmuchhuak a. A tha leh zung, a ngaihtuahna leh zirchianna tawmpui miah lova “Kan kal dan pangngai hi a tha e,” tih leh ringawt thin hi tihtawp a va hun ta em aw tih ka ngaihtuah. Kohhran leh sawrkar inrelbawlna kalphungah tihdan phung pangngai zawm hi ‘dan’ emaw kan tih tlat thin avangin hma kan sawn hlei thei lo chu a nih ber lo maw???

Political entrepreneur an sawi lar ber chu Manmohan Singh-a kha a ni a. A ngaihtuahna thar, a innovative mind khan India ram a khalh hmasawn an ti. Keini pawh hian Manmohan-a ang tluk pha chiah lo mah se ngaihtuahna thar, economy chawisang thei kan mamawh ngawt mai.

Ngaihtuahna thar, mi la tih ngai loh chin dan thar, mi lo tihdan hlui pawh nise siam danglam leh her danglam hret hi tunlai khawvel intlansiakna a ni a. America ramah phei chuan “Innovation is business” an ti hial a. Kalphung dan pangngai (conventional) hi a paih dan an zawng a, thilthar tih an intihhmuh a, chu chuan changkannna leh hausakna a thlen thin a ni. India mithiam Ngaihtuahna seng mi, mi thiam Dr. Sam Pitroda hovin PM Manmohan Singh-a hunlai khan “National Innovation Council” an din a. Mimal eizawnna mai bakah sawrkar kalphung (governance)-ah thil tha zawk, thil thar sengluh theih dan a awm em tih kha an zawng nasa hle a. Chumi kal zelah chuan Planning Commission thiatin NITI Ayog te pawh alo pian chhuah phah e, an ti.

Mi fate hian ngaihtuahna hi an seng nasa khawp a. Khawvel hi mihringte tana chenna nuam zawk alo nih theih nante, mihring leh mihring inkara inhriatthiamna thuk zawk a awm theih nan te, eibar zawnna ngelnghet leh hlawk zawk kan lo neih theihna turte, sumpai senso ngai tho seng siin engtinnge hlawk zawka thil kan tih theih ang tihte hi an lo ngaihtuah a. A tihdan tur an zawng a, an hmuchhuak a, nang leh kei hian kan lo chhawr tangkai thin a ni.

A hnuaia ka thil han tarlante hi in ngaihtuahnaah alo lut ve tawh ngai em?

1. Central atanga pawisa kheuh chhuah tam intihsiak lovin pro­ject hrang hranga kan pawisa hmuh ang ang hi daihzai, ngelnghet, amah leh amah intungnung chhunzawm zel turin enge ngaihtuahna thar kan neih tih mipui atangin sawrkarin ngaihdan la teh se.

2. Kan sawrkar office-a file kalphung pangngai ringawt ni lo. Lehkha reng reng – Director in a han initial phawt a, chuta tangin Jt. Director-ah, Dy. Director-ah, Asst. Director-ah, Superintendent-ah, Assistant-ah, UDC-ah, LDC-ah. A ngaitein a let zawngin a chho leh a. Chutiang tho chuan Secretariat-ah a ni bawk si. Mipui tan hian a va manganthlak em!! Sawrkar chu mipui tana ding a nih si chuan sawrkar kalphung tihawlsam (simplify) hi a va hun ve ta em!! Engtia tihtur nge tih ngaihdan sawrkarin la teh se.

3. Sports leh Games te hi kan tuipui si a. Discipline hrang hranga world class infrastructure chu sawi loh national level hmunhma nei turin keni ang state pachhia tan kawng a hla em mai. Ram pum huap, khawmualpui leh khawvel huapa medal lak hi kan thupui ber a nih si chuan eng­a­tinge a mimal (individual sportperson) tihmasawn zawnga kan kal mai loh? Thei leh thiam fal bikte thlang chhuakin ram pawn zauzawk-ah coach tha zawk, hmunhma tha zawk leh exposure tha zawk nei tura kan tirh mai loh?

4. Khawvela ‘profession zahawm ber’ nia kan ngaih chu tihdamna hna thawktu kan doctor te hi an ni, tih hi kan ngaihdan ni kumkhua a ni a. Tunlai hian mi tam tak profession zahawm lutuk ni ta lo riauva hriatna an lo nei ta a. Tam tak chuan tihdam rawngbawl hna leh a thawktu kan doctor tam takte hi kan hrisel lohna leh manganna hmanga sum siamna huang a ni ta mai em ni an ti. Heti zawng hian ka ngaihtuah ta daih a.

Engatinge sawrkar damdawiin-a OPD-ah hian chawhnu dar 2 hnu lamah private clinic hawn kan phalsak law law mai loh? Damlo pakhat enna-ah Rs. 500/- an la a, private clinic atana OPD an hman chuan sawrkar-ah revenue Rs. 50/- zel chhung lut ve thung sela. Chubakah, chhan hrang hrang avangin private damdawiin-ah mi an refer a, sawrkar damdawiin-ah khum a indaih lo a, hmanrua an nei tha tawk lo tih hi pawmsak ila, an va hlawh chhuah atang khan engzat percent emaw sawrkar-ah chhunglut ve thung ta mai sela.

5. Khawtin vengtin-ah Community hall emaw badminton hall kan duh a. Acoustic hall tura design kan thiam leh mang lawi si lova. A khawk rum rum a, thusawi leh zai pawh a thangkhawk ral vel mai mai a. Engatinge kan hall bang­ah te hian concrete deuh reuhva leirawhchan kher kan hman le? Thlasik laia sah mau leh rua chang tha ngeiin thum-bawh-kaihsawih dâp te kan hall bangah kan hman mai loh le? A man a tlawm zawk ang a, acoustic hall tha tak kan nei mai dawn bawk si.

6. Sawrkar laipui Ministry of Finance, Department of Expenditure chuan August 2014-a order a tihchhuah-ah khan sawrkar officer te motor hman tur a lei dawnin Rs. 4,75,000/- man aia sang lei loh tur a tih lai pawh khan engatinge keini ang state rethei hian car/motor manto, nawmchenna (luxury) car leh SUV kher kher kan lo lei thin le? Car man tova chuan hian kan hotuten hna an thawh tam phahin an efficiency a san phah sawt tihna a ni ang em?

7. Ni za inhlawhna a kal mup mup lai hian khua leh ram tana ro tling tur kan ngaihtuah ngai em? Pathian­in malsawmna min pek kan ruah­tui khawlna tur man to lova tuizem lian siam te engatinge khawtin hian kan thawh mup mup loh le?

8. Vai ramah chuan Self-Help Group (SHG) an hlawhtlinpui hle mai a. SHG pakhatin cheng nuai za tel an chetkualtir thei tih vang ringawtin kan Mizo zia ngaihtuah miah lova vai ram style-a SHG kalpui tlat kan la tum hi a fuhlo a ni mai lo maw? Engatinge Mizo ze mila SHG ang tho ruahmanna thar siam tura vawiin thlenga ngaihtuahna kan la sen loh le?

9. Mizote hi lehkha zir uar hnam kan ni a. A tithei leh hausa deuhte chuan vai ramah school manto leh changkang kan pan ruih ruih a. Engatinge kan mi hausa deuhte hian international school tha thlunzawmin Mizoramah international school din tuma hma an lak ve duh tlat loh le? Engatinge Mathematics leh Science subject te hi High school chinah tal hi chuan Mizo tawnga kan inzirtir loh le aw? tihte pawh hi ngaihtuah tham a va ni em aw. 

10. Engatinge kan sawrkar hnathawk zawng zawng – a hlawh tlem leh a hlawh tam te hian kum khatah ‘professional tax’ inzat vek an la pek tlat le? Kan sawrkar hnathawkte professional tax pek hi an hlawh tam dan a zira bithliah that a hun tawh viau lo maw?

Tawk rih teh se.