- Lalnunmawia Pachuau

ZPM Ministry chuan Budget an pharh tirh phat atangin Ruang phurhna sum Budget-ah an dah ta a. He system thar hian MLA te phurrit a chhawk zangkhai hle in a rinawm. Kum rei tak kan politics kalpui danah kan MLA te ko a rit thei em em a, damdawiina awmna sum thlengin MLA ten mawhphurhna an lâk chang a awm thin. Vanduai­na tâwpkhawk thihna a thlen phei chuan Ruang thawn­chhuahna tur sum chu bialtu MLA tum turah kan dah hmak tawh mai thin a, hei hi kum rei tak kan kalphung nghet a ni tawh. Zan tairekah pawh bialtu MLA kaih­thawh ngaih châng a awm fo thin. Thingtlang khaw hla tak taka ruang phurh­chhuah ngai te chu sumsên a sâng thin hle a ni.

ZPM kaihhruai sawrkar chuan Ruang thawnchhuahna sum hi kum 2024-2025 Budget-ah Vaibelchhe 5 a dah a, nikum 2024 September thlatir atang khan sawrkarin mawhphurhna a la tan a, dated 6.02.2025 thlengin ruang thawnchhuahna sum atan hian Vaibelchhe 2.33 pekchhuah tawh a ni. Vaibelchhe 2.33 hi mi 238 ruang phurhna man a ni a, ruang phurh man dilna lut zinga 83 chu pekchhuah a la ni lo thung. He ruang phurh dilna hi online-a dil theih tura buaipui mek a ni bawk.

Ruang Phurh denchhenin MLA hlawh tihsan a lo ni tawh:

MNF Ministry hunah khan ruang phurhna atana MLA te sumsên tam lutuk chhawk zangkhaina turin hlawh tihpun a lo ni tawh a. November ni 21, 2019-a Mizoram Assembly thasik thutkhawm an neihah khan MLA 40 te hlawh chu 130.77% laia tihsan niin Rs 65,000/- atangin MLA pangngai thlakhat hlawh chu Rs 1,50,000/- ah an tipung tih kha kan la hre theuh awm e. MLA hlawh tihsan a nih hma khan Speaker-in MLA Fund atanga Morgue Van lei theihna turin Rules a siam danglam a, mahse awmzia a nei vak lo nge ni hlawhsanna Bill chu passed a ni ta tho a.

ZPM Ministry erawh chuan kalphung thar, system thar lo duangchhuakin kawng thui dan a zirin rate a siamfel a, Budget-ah ruangphurhna tur sum a dah thung. He system-ah hi chuan MLA ten mawhphurhna an nei ta lo a, an pocket atangin sum a hêk tawh lo a, Opposition MLA tan a chhenfakawm zual hle a ni. He system hi a fel famkim bik kher lo mai thei, mahse ruangthawn chungchanga system kalpui chinah chuan a la zia berin a lang.

MLA te mawhphurhna enge ni?:

MLA te mawhphurhna bulpui ber chu Legislator an nih ang leh Indian Constitution Seven­th Schedule (Art 246) in thuneih­na (power) a pek angin State List (List-II) leh Concurrent List (List-III) huam chhunga Dan siam hi an hna pui ber a ni. Financial power ni se State treasury sum hman tur zawng zawng te pawmpui tu an ni a, Money Bill an passed a ngai a, Executive power lamah Chief Mi­nister leh Council of Ministers te chêtlakna kawng hrang hrang an control thei a, No-Confidence motion an tel lova passed a ni thei hek lo. Executive hmalakna hrang hrang control turin MLA te hian Question Hour, Cut Motions leh Adjournment Motions te an exercise thei bawk a, a nihna takah chuan Executive hmalakna zawng zawng hi MLA te control-na hnuai­a awm a ni. Indian Constitution siamthat hna thawk turin state tin te MLA approval la in Parliament-in a ammend thin a, President of India thlanna pawh an kuta in­nghat a ni.  Hei bakah hian Ram leh hnam tan hmasawnna ruangam din te, ram mipui harsatna tawh chinfel te hi an mawhphurhna a ni.

Kum rei tak kan kan lo kalphung nghet chu; damlo kan te, ruangthawn chhuahna sum tumsak te, mitthi ina kal tam te, ruang­zawn leh mibo zawn te, etc., hi kan MLA te mawhphurhna leh tihtur ah kan lo ngai nghet tawh thin. Chhiatni thatnia an inlan tam loh chuan MLA hawihhawm lo, phungthlu lo leh bial mipui te ngaihsak lo nih an hlawh letling hlauh thung si a. MLA tha leh tha lo kan tehna hmanrua ber a ni thin.

Kan aiawha hnathawk tura kan thlan te hi chuan an rilru, hun leh tha sêngin kan ram tana dan tha zawk duangchhuak tur leh hmasawnna ruhrel duang­chhuak turin hun thawl zawk pe ta ila, kawng hrang hrangah pawt buai lovin phût buai lo bawk ila hma kan sawn phah zawk ang em tih te hi ngaihtuah ngai tak a ni zawk a. Amaherawhchu, vawi leh khata system nghet hi thlak thawk thawk theih a nih loh zia erawh mipui hian kan hrethiam vek awm e.

Kan kalphung nghet tawh thlak danglam tur hi chuan sawrkar hian system tha a duanchhuah a ngai thin. Tunah pawh MLA te phur tirit tu ber thin Ruang thawnna sum chu sawrkar-in budget-ah a dah ta hian MLA te eirûkna thlengin a sutkian a rinawm. Ruang thawnna atana sum sên te, damlo kanna atana sumsên te a tam tham poh leh MLA ten kil hrang hrang atanga an senral hmuh let (recover) an tumna a nasa thin a, mipui sum tláng a heu phah leh thin tih kha kan hrethiam theuh awm e.

Budget-a DAH hi mipui phurrit chhawk zangkhaitu a ni:

Damlohna leh thihna pumpelh thei tumah kan awm lo a, vanduaina hi thlasik anga khel lova thleng thin a ni a, he manganna hun ah hian chhungtin te hian thlamuanna kan mamawh thin. Ram changkang apiangin policy an nei tha a, mipui ten security an neih that vangin an thla a muang thin. Kan ramah erawh mipui phurrit chhawk zangkhaitu scheme hi a beitham hle thin a, hei hi kan retheih vang leh kan economics dinhmun a chhe lutukin a hrinchhuah a ni.

Damna duh vangin neih­thinglung khawngin hmunpui Damdawiin tha kan pan hram hram thin a, mangan tawpkhawkah bialtu MLA kan pûr leh thin. Chutah vanduaina kan han tawk a, chhungkaw pa berin zah pawh dáwn lova MLA te hnena khawngaih a dil hun hi a her­chhuak leh thin. Tunah erawh ruang phurhna chu kan sawrkarin min tumsak tawh vangin engang vanduaina pawh tawk ila, kan lungduh ruangdài ten kan inlum ngei an thlenna turin sawrkarin ruahmanna felfai tak a siam ta hi mipui te hian a hlutzia kan hre­chiang chho zel turah ngai ila.

Mipui tan Budget-ah a lo DAH theih nameuh mai:

Traffic jam solve kan tumna PAHOSS Scheme atan MNF ministry-in vaibelchhe 100 tel an vawmliam ngam laiin Mizoram mipui ten rualkhai taka kan chhawr theih ruang phurhna sum ZPM ministry-in Budget-ah a dah ngam ve thung a. Congress leh MNF Ministry ten a thlawna semral tur NLUP sum Vaibelchhe 3000 lai leh SEDP sum Vaibelchhe 1000 lai kan Budget atanga an rua­hman ngam laiin ZPM minis­try chuan kut­hnathawktu te thlaithar leina tur Budget-ah kum khatna atan Vaibelchhe 200 a dah ngam nghal bawk a. Ruangthawn chhuahna budget-a dah bakah Health Care system tha tak a lo kalpui chho leh turin beisei bawk ila, mipui thlamuanna thlenchho zel turah ngai phawt mai teh ang.

Ruang phurhna tur sum Budget-a DAH theih a nih zia kan hre ta a, Thlaithar leina pawh a DAH theihzia kan hre ta bawk. A kum 1-na hmel kan hmuh awrh ZPM Ministry kalphungah hian eng­kim hi a felfai duak duak bik dawn lo a, fur laia kawngsiam tura nawr vak vaktu te authawm kha thal a lo thlen meuh chuan thereng vuakthlak ang maiin a reh ta hmak a, alkatra rim vangin an ka an hup a ni mahna. 

Leiba bak hnutchhiah lo tu te khan ZPM ministry naupang te hi engkim tifel nghal duak turin an han nawr ta ngat ngat a. An leiba hnutchhiat Health Care bill, Electric Bill, Pension, etc., bâ chu ZPM chuan a lo pe chho mawlh mawlh a, kawngtinrengah sum inremchenna chuan rahtha a chhuah chho zel a. Mual lehlama khawhlut zur zur, liam zur zur, mi tlemte bakin an thâl ve theih loh tuikhurpui ang kha hmuh tur a awm ve ta lo ringawt pawh hi Zofa te thlamuanna thlentu a ni.

Mihausa te vawkchaw leh archaw atana ration kaltlanga sum sen thlawn tawk tawk te, MR Bill dik lo tak tak te, Electric bill pek that loh vanga sum chawi tawk tawk te pawh a kiam chho ta zel a. Delhi drip khaia kutdawh rilru kan put rengna hi paih bo chho zel ila, keimahni thawh­chhuah atanga theihtawpa intodelh tuma hma kan lak chhoh hi kan ram leh hnam zahawmna tur diktak a ni.

Mipui nawlpui ten rual­khai taka kan chhawr theih ruang thawnchhuahna sum budget-a dah bakah hian mipui te tana chharnahawm system thar tha dang hi kan sawrkar hian lo duangchhuak chho zel turin beisei phawt mai ila. Ram mipui sum hi diktak leh daihzai taka hman a nih zel chuan rah duhawm tak a chhuah chho zel ang. ZPM chunga mipui ten rinna kan nghat ngam ang chiah hian ZPM Ministry pawh hian mipui rinngam ang ngeiin hna an thawk ang tih beisei phawt mai teh ang.