– F. Vanlalpeka, IMCS Aizawl

Hnam (Nationality) nihna  hming hi mahni chenna mila hming dang vuah ngawt chi a ni lo.

Mizo National hrula inhamtang lovin, Mizo chu Mizo

He khawvela Hnam nihna kalphung leh Hnam kan nihna thuah dawn chiang tawk lo kan la awm reng mai. 

Kum 2023 hial kan lo chuangkai tawh a, Indian Union hnuaiah hian keini Mizorama hnam bil tam tak te hi Mizo Hnam anga ziah luh vek kan ni. Chutiang bawkin, state pawn lama cheng, a bik takin, Manipur hmuna cheng, Tribal hnam (Naga hnam ni lo zawng) te chu Mizorama Hnam bil chi hrang hrang kalkhawm te tho an ni a. Manipur state-a cheng pawh ni se, Mizo Hnam (Mizo Umbrella) hnuaia awm vek an ni.

Indian Union hnuaia kan nihna Mizo National chhungah hian, Manipur Tlangmi hnam bil heng : Thahdo, Hmar, Paihte, Vaiphei, Simte etc.....  zawng zawng te hi an tel vek. Rangte@Gangte Hnam erawh chuan Mizoram Mizo angin an nihna an tichiang tawh.

India ram chhungah hian Hnam nihna kalphungah,  Hnam bil hming ringawtin a khawsak theih lohva, Hnam bil hming tarlang thin mah ila, eng Hnam National hnuaia awm nge ? tih a ni tho tho. Hnam nihna nghet leh hming put nei lovin  Hnam siper ringawtin a awm ngawt theih lo. 

Khawvela Hnam (National) kalphung hi thlir ila, India ramah ngei pawh, Hnam kan nihna (Nationality)-ah Mizo ti-a ziah fel vek kan ni tawh.  He ziah fel vek tawh-ah hian Manipur state-a awm te chu Manipur Mizo an ni mai.

Nimahsela, Manipur Mizo kan tih Hnam bil thenkhat te chuan Lushai Hill atanga Mizoram ni ta, he rama chengte pawh Mizo ni zui ta, Mizo lal ten Rorelna bera an tawng hman Lusei tawng hi an mil lem lo. 

Tunhma khan  Lusei hnam thikna hi hnam bil tinah a lian hle. 

He Mizoram-ah ngei pawh, Lusei Hnam bil thikna a nasa hle a,  Senvon khua-ah intawhkhawmna neiin, "Lushai Hill leh Lusei  hming a nih loh phawt chuan eng hming pawh ni se, kan pawm vek" tih a lo nih tawh kha. 

Chuvangin, khatih laia Sawrkar laipui lama kan mi hmasa (Pu Hlira ( L) Thakthing, Aizawl etc..) min hrilh dan chuan,  Lusei hnam thikna sosang vak khan Hnam hmingah Mizo kan ti a, a ram hmingah pawh Mizoram tiin, khawvel hriatah kan inziak lut a ti.

He ramah hian Lusei hnam hming vek maiin thil a lo kal  tawh a. An lo helh hle tawh a lo ni a. Chuvangin, Lusei hming aiah, uluk takin, a thlak nan, Thlangtla mihring hming  reng reng  chu Mi  tih vek a ni a, he ram hi Phaizawl hmun ni lovin, tlangsang, zothlifim thawt heuh heuhna hmun, tlang thawveng nuam tak hmun hi "zo" a ni. Hnam hming a ni ngai lo. Zo tih hming hi tlangram boruak thengthaw nuam tak sawina hming a ni. 

Hei vang tak hian Lusei hnam bil aiah, he rama chengte sawi nan,  MIZO hming an vuah ta a ni.  He ram ngei pawh hi MIZORAM tiin, "Indian Union hnuaia ziah luh a ni" tih hi hriat dan a ni.

India ram History thilah te, Mizoram chanchin ziaktu ten Mizo chanchin an ziah reng rengin,*Mizo (any Lusei)* tih  an dah kher thin. He inziak  hi la helh zuiin,  kum 1968 chho atang daih tawh khan Manipur Mizo kan tih zinga thenkhat chuan, Mizorama Mizote chu vawiin ni thleng hian Lusei an la ti lui tlat thin.

Chhinlung chhuak, Thlangtla, he tlangrama cheng Hnam bil hrang hrang ten he rama Lusei hnam bil thikna avanga kan Hnam intawmna hming tura Mizo an ruat hi khawvel hriata kan neih tawh, kan Hnam Identity dik tak a ni. 

Chuvangin, Mizo hi kan National hming a ni a, Mizo hi Mizoram chhunga chengte tan chauh a ni lo.

Hetih mek laia "MIZO KA NI LO" tiin emaw, Mizoram chhunga Mizote hi "LUSEI" la ti bik tlat te,  Mizo Hnam tana kan Tawng hman intawm (Common Language) hi "LUSEI TAWNG" bik anga la ngai lui tlat kan la awm hian Mizo Hnam anga inpumkhat (Mizo National Integration) a ti harsa ti pawhin a sawi theih.

State danga kan chen avanga kan Hnam nihna (National Identity) thlauhthla a, Mizo Hnam hrula kan inhamtan zel mai hi paih a hun ta. 

Mizo chu Mizo ni mai rawh se. Inpumkhatna kan sawi kan sawi lai hian Mizo chiah lo, Mizo hming hrula kan la chawl khawmuang a, Mizo kawtchhuaha  che kual mai mai lo hian,  kan nihna zahpui lovin, kan pianchhuahpui tur leh kan thihpuina hming chu Mizo ni rawh se. 

Mizo Hnam Thisen, Mizo Umbrella hnuai atang lo chuan kan thenawm state lakah awmzia kan nei ngai lovang. 

Chhinlung chhuak tih kan leklam ngun lutuk pawh hi a fuh lo thei ta ! India ram roreltute hian min lepse zel dawn niin a lang. Mizorama chengte ngei pawh kan tobul hmang hian min ti Chhinlung thar thut palh hlauh ang e. 

Manipur Meitei-ho te pawh hi Mizote nena kan thlangtlak intanna hmun a inang reng a, Central India lam khuan hre ru reng mahse, NE state Kristian an ni ve tlat lo. An him ru tlat.