July 21, 2023; Mizoram larsap Hari Babu Kambhampati chu vawiin khan a chenna Raj Bhavan-ah Tlabung Village Council-ten an kawm a, an khaw panna kawng sial hna thawh chu hmun dang aia a muan avangin a bik taka ngaihpawimawhsaka hma la turin an ngen.

Tlabung VC-te chuan an khua leh a chhehvel panna kawng, National Highway 302 sial hna chu a nih dan tur anga thawh ni loa lung sakhat phah a nih ngai loh avangin ni tin deuhthaw zan khuaa tâng lirthei a la awm reng niin an sawi a, kawng sial hna thawh chu a muang hrim hrim bawk nia sawiin, Mizoram hmun dangah kawng sial hna thawh tur za zela 70-90 vel zawh a nih fur laiin NH 302 erawh hna thawh tur za zela 17 (17%) vel chiah zawh a la ni tih an sawi.

Hei bakah hian, mihring hmasawn leh hmasawn loh tehna pawimawh zual thil chi hrang hranga hnufualte dawmkanna tur Pradhan Mantri Jan Vikas Karyakram chu an khua leh a chhehvelten an chhawr phak loh thu sawiin, dawmkan ngaite chawikanna tura duan a nih ang taka he scheme-in an khua leh a chhehvelte a tuam theihna tura hma laksak turin an ngen a, an khua leh a chhehvel chu hriselna, zirna leh infiamnaah ngaihsak leh ngaihpawimawh ngaia an inhriat thu an sawii

Mizoram Larsap Hari Babu Kambhampati chuan amah kawmtu Tlabung khawtlang hruaitute thil thlen chu pawimawh a tih thu leh, a tul anga lo en zui ngei a tum thu, a lo hrilh a, Tlabung chu a khaw hming pawh a lo hriat fo tawh thu sawiin, remchang hmasa berah tlawha zin ngei a tum thu, Tlabung khawtlang hruaitute hi a lo hrilh a ni.