Aizawl; Tlawng lui hmun riat-ah tui lian leh ruah bawhawk sur palha mipuite an lo inralrinna tur ‘Flood Warning System’ dah a ni dawn a, hna pawh thawh mek niin March 2024-ah chuan a bun hna hi zawh hman tum a ni.

ZALEN-in Irrigation & Water Resources Department (IWRD) thawktute hnen atanga thu a dawn danin Tlawng hnar lamah khawl eng emaw zat bun tan mek niin heng khawl sensor-te hian ruahpui sur leh tui lianah warning pein chung an warning hmang chuan Sairang, Hortoki leh Bairabi-ah fimkhur a ngaih thu hriattir an ni dawn tih an sawi.

“Tlawng hnar hmun rukah khawl hi kan bun ang a, chu chuan tui awm dan hi rawn hriattirin a hlauhawm leh hlauhawm lohte Lengpui leh Sihhmuiah hmun khat, Sairang, Hortoki leh Bairabi-ah hmun hnih theuhah flood warning system hi dah a ni dawn a. Tui lian leh hlauhawm a awm chuan a chhe berah Bairabi-ah darkar li hma leh Sairangah darkar hnih hmain warning pek theih kan beisei a ni,” an ti.

IWRD thawktute chuan tuna India ram hmun hrang hrangah tui lian tur inhriattir lawkna chu awm tawh mah se tuna Mizorama bun tur chu India rama a hmasa ber tur a ni tih an sawi a. “Tuna Mizorama concept kan hman tur hi India ram hmun dangah hman a la ni lo a. Tui lian tur warning hi hmun li-ah chuan ri (sound) hmangin hriattir an ni ang a, hmun li dangah chuan ri leh hmuh theih (sound & visual) hmanga tih tum niin khawl tha ber ber hman tum a ni,” an ti.

He hna thawk tur hian NERIST nen inremna an siam dun tawh niin an sawi bawk. 

Flood warning system chu mipuiten an tangkaipui an beisei tih sawiin IWRD thawktute chuan, “Tui lian vanga chetsualna tam tak hi pumpelh theih kan beisei a. Lui kalte tan pawh fimkhurna turin warning a pek dawn avangin vanduaina thleng thei lakah pawh kan him phah kan beisei a ni,” an ti bawk.

Flood warning system bun hna leh enkawl zui hna hi company thlan bikten an thawk dawn a. Company-te hian khawl bun mai bakah kum nga chhung enkawl zui hna hi an thawk chhunzawm dawn a ni. 

BOX
National Hydrology Project (NHP) hnuaiah Mizoram tana sum ruahman zat chu cheng nuai 3277 a ni a, sum cheng nuai 1852.25 hmuh tawh niin cheng nuai 1735.29 hman ral a ni tawh. Flood warning system tan bik hian nuai 920 ruahman a ni.