ZALEN November 29, 2024 : Congress thalai chuan vawiin khan Lengpui panna kawnga Tlawng Lei (Bridge) dawh mek 'Inclined Network Arch Bridge' hnathawh muang avanga mipui harsatna thlen phah mek chu an enfiah a, hnathawh muang lutuk chu mipui zahlohna leh ZPM sawrkar leh a changtu Minister inthlahdahna dik takah a ngai tih an sawi.

Congress thalai te hi Project Manager Poddar Mirdul chuan a lo dawngsawng a, December 10, 2024 a Lei dawhkai an tum thu a lo hrilh a, an dawhkai thei lo anih chuan mipui zawng zawng kal tlang theihin a helna (Road-Diversion) tha zawk Light Motor Vehicle (LMV) chin tlan theihin an siam ang tih a lo hrilh bawk.

Laltawnliana President MPYCC chuan, October ni 29, 2024 khan Sr. EE, PWD, National Highway Division-l, Aizawl-in a dil angin Aizawl SP Rahool Alwal, IPS chuan Tlawng Lui chunga Lei (Bridge) innghahna nawr thlenna tur kawngpui tan tlanga kaina track siam a ngaih dawn vangin 30.10.2024 atanga 30.11.2024 inkar (ni 32 chhung) lirthei eng chi mah tlan phal lohvin kawng khar tur hi thuchhuah a siam a. Aizawl, Lengpui Airport leh Mamit lam kal tur te pawh harsa takin Buichali lamah kal tir vek an ni.

Congress Thalai chuan kawng khat avang hian Damlo leh khualzin te phurrit a thuahhnih a. Mipui harsatna a thlen chunga lei dawh kai hna zawh a la ni lo leh hnathawktu mumal pawh an awm lo chu mipui zahlohna leh ZPM sawrkar leh a changtu Minister inthlahdahna dik takah a ngai a ni, a ti.

Laltawnliana chuan, "Lei dawh thatna atan hian cheng 36,99,00,009/- ruahman a ni a. Nikum 2023 October thlaa zawhfel hman tura tih chu a hun pawh sei niin kumin March 2024-a zawhfel tura tih leh a ni chunga tun thlenga zawh theiha peih a la ni lo chu Mizoram PWD leh Company he lei dawhtute karah thawhona tha engmah a awm loh vang a ni a. Hei hian a vil (Supervise) tu Mizoram sawrkar chak lohzia tarlannaah Congress thalai chuan an ngai a ti bawk.