Aizawl May 28, 2023: Tun hnaiah ruah a sur zeuh zeuh avangin Aizawl khawpui chawmtu, Tlawng tui pawh a tam leh deuh a, PHE pawhin mipui mamawh tui an pump thei.

ZALEN zawhna chhangin PHE department thawktute chuan Aizawl khawpui chawmtu, Greater Aizawl Water Supply Scheme Phase I leh II-ten tluang taka tui an pump theih chuan ni khatah 34 mld vel an pump thei a. Mahse, khawl hi darkar 24 chhung chawl lova hna a thawh reng chuan a chhiat mai a hlauhawm avangin ni khatah darkar khatte chawlhtir thin a ni a, tunlai hian ni khatah chawhrualin 29 mld vel pump thin a ni an ti.

Ni khata hetiang zat vel tui an pump chuan mipui mamawh zualpui chu tui an pe thei tih sawi bawkin kumin thal lai vel kha chuan ni khatah tui 23 mld-te an pump a, Tlawng tui a tlem zel bawk avangin harsatna an tawk hman deuh niin an sawi bawk.

May 9-16, 2023 chhung vel khan Aizawl tui lakna, Reiek kaia Tlawng luiah tui a tlem hman hle a. Hetih vel lai hian Tlawng luiah tui litre maktaduai 39.9 vel chauh a luang a, hemi avang hian ni khata tui an pump chhuah thin ang an pump theih loh avangin harsatna an tawk hman niin PHE thawkte chuan ZALEN an hrilh.

PHE hian heti zat tui hi pump mah se tui bothlau a tam avangin mipui hnen thleng lo hi a tam hle a, 30% vel chu bo anga ngaih a ni.