August 3, 2022; Nizan dar 6:30 bawr vel a Sairang, Sihhmui kai a, Venue car, MZ 01 U -1162 chesualna thlengah, he thu ziahlai thleng hian C. Lalfakzuala @ Mafaktea (39) H/o Rebecca Lallawmzuali leh a fapa Malsawmkima @ Sawmsawma (10) te chu tun thlengin an chin hriat a la ni lo a, ngawrh taka zawn hna thawh mek zel an ni.

ZALEN thudawn danin, Sihhmui kai bul, Leidawh thlen hma deuh kawng kual laiah motor dang nen an intawk a, kawng khuar lai an dai hnuah Tlawnglui ah an tla thla a, an chetsual lai lo hmutu te leh an thurualpuite tho an hnung a tlante bakah, Sihmui mi an chetsualna hnai a lo awmte chuan an theih ang angin chhanchhuah tumin hma an la nghal a, Mano Lalrinhlua le Lalngaihawma, Chaltlang Lily veng te chu chhanchhuah an ni a, Mafaktea te pafa erawh tun thlengin an chin hriat theih an ni zui ta lo a ni.

Mano Lalrinhlua leh Lalngaihawma te chu Sairang PHC panpui an nih hnuah Civil Hospital, Aizawl panpui an ni a, an dinhmun a ngaihtuahawm loh nia hriat an nih vangin in lama in enkawl tura hawtir an ni.

Nizan lamah Sairang, Sairang Dinthar, Sihhmui, Central YMA disaster team te bakah Chaltlang Lily veng atangin mi thahnemtak chetsualna hmunah hian an thleng nghal a, zan lamah tihtheih a tam loh avangin a nawlpui anga zawn hna thawh hleih theih a ni lo a, Tlawng kai hmun thenkhat ah erawh tlaivar a duty an awm thung.

Tukin vartian atang khan Bairabi leh Hortoki lamah pawh venbuk siamin, chinchang an lo ngaihven a, Central YMA disaster team, Sairang, Sairang Dinthar, Sihhmui bakah, Chaltlang Lily veng, Chaltlang, Bawngkawn leh Lily veng thenawm hnai Branch YMA te hnatlangin an thawkchhuak chhunzawm nghal bawk a, he thu ziahlai thleng hi chuan Mafaktea te pafa hi hmuh an la ni lo a, an chetsualna lirthei pawh he thu ziahlai thleng hi chuan lakchhuah theih a la ni lo. Hnatlang thawkchhuakte ei leh in turte, chhiattawk chhungte tanpuina turte in mi thahnemngai ten thilpek an pe mek zel bawk.

Tarlan tawh angin Mafaktea hi Thuampui, Aizawl a CK. Enterprise (motor rawng kahna dawr) neitu niin, an dawr thenawm a an thiante birthday lawmna, Daifim picnic spot ah nimin khan an kal a, an hawlam ah vanduaina hi an tawk a ni.

Chaltlang Lily vengah a nu Rozingi hova a nupui fanaute nen a khawsa an ni a, a pa nen a chin hriat loh a awm mek, Malsawmkima, kum 10 mi hi an fapa neihchhun niin, unau hmeichhia 2 a nei a, an milai niin, Noah's Foundation School, Chaltlang a class - IV zirlai a ni.

ZALEN zawhna chhangin Mafaktea nupui Rebecca Lallawmzuali chuan nizan hmasa leh nimin zing lamah te engmah ngaihthat lohna tur thil tawn an neih a hre lo tih a sawi a, an fapa Sawmsawma chu tuicheng tur an nih vanga a phur thu te, nimin veka a cousin te naute birthday lawmna lam a an ruala kal tura a sawm pawhin, 'tuichen ka chak a lawm,' tia a chhan thu a sawi.