ZALEN March 6, 2025 : Vawiin nilengin National Urban Health Mission, NHM Mizoram hmalaknain a thlawna inentirna (Free Clinic) TNT, Muanna Vengah neih a ni a, he free clinic ah hian damlo 600 vel en an ni a, natna chi hrang hrang an vei tih hmuhchhuah a ni.

Dr. Lalawmpuia Chhangte, State Nodal Officer, NUHM chuan a thawna inentirna buatsaih a nih chhan sawiin, TNT hotute hnenah lawmthu a sawi.

TNT Founder Chairman, Dr. Sangthankima'n TNT-a awmte a hun taka enkawlna an dawn theih loh thin avanga harsatna tawk an awm thin thu te, natna an neih pawh an sawithiam thin loh avanga natna benvawn nei enkawl harsa tak tak an awm thin thu te a sawi a. TNT-a awm te an hriselna an ngaihpawimawh avang leh sum leh pai leh hun hlu tak senga a thlawna inentirna an buatsaih avanga lawmthu sawiin, Pathian hnenah tawngtaiin a hlan.

He Free clinic-ah hian doctor 10 ten damlo an en a, damdawi chi hrang hrang a thlawnin Rs 2,50,000 man vel sem a ni a. National Health Mission hnuaia Programme - NUHM, NLEP, NIDDCP, NTEP, NCD leh MSACS thawktute'n natna chi hrang hrang an hriselna te endikin, programme hrang hrang atang hian thawktu 50 vel an kal bawk.