May 9, 2024; India rama civil mite chawimawina sang Padma Shri chu zanin khan India President Droupadi Murmu in TNT dintu Sangthankima hnenah a hlan.

Sorkar laipui chuan January ni 26 Republic Day khan kumin atana Civil mite chawimawina hrang hrang, Padma Shri, Padma Bhushan leh Padma Vibhushan dawng turte a puang a, Padma Shri dawng tur mi 34 zingah Mizoram atangin Sangthankima hi a tel a ni.

Thutak Nunpuitu Team (TNT) dintu Sangthankima hian Mizoram hmun hrang hrangah centre a din a, chung hmunah te chuan fahrah, vohbik, ruihhlo ngaite thlengin a enkawl a, chung a enkawlna kawngah chuan Pathian rinchhanin ke a pen a ni.