ZALEN May 25, 2025: Mizorama tomato ching nasa ber leh thar tam ber nia hriat, Tualte khua chuan kum dang angin tomato an hralh tha lo a. Tomato atangin wine siam phal ve se an duh tih an sawi.

ZALEN-in a kawmnaah Tualte Tomato Growers Association President Lalchhanchhuaha chuan kum dang angin tomato an hralh tha lo tih a sawi a. “Kum dang, tun ang hunah kha chuan ni khatah bawm 1,000-te kha harsatna awm lovin kan hralh thei a, kuminah erawh chuan sum vâng lutuk vangin bawm 500 pawh tihral kan harsat a. State pawn, Tahan leh Silchar-ah te kan pek vangin kan la ziaawm hram hram a ni,” a ti.

Tomato atangin wine siam phal ve se an duh tih sawi bawkin Lalchhanchhuaha chuan, “Sawrkar hian thlai dang thenkhate angin tomato atang hian wine siam min phalsak ve se ka ti hle a. Tuna kan hralh ang ringawt hi chuan a thar tam laiin a buaithlak a. Tomato souce leh ketchup-ah te siam thei mah ila a hmanraw man hi a sang a, kan elpui company-ten an titlawm thei bawk nen, kan tan chuan tihngaihna a awm lo a ni,” a ti a. Hemi chungchang hi remchang hmasa berah chief minister sawipui an tum tih a sawi bawk.

Tualte Tomato Growers Association President chuan April 7, 2025 atang khan tomato chu an lo tan tih a sawi a, October thla tawp lam leh November thla tir lam chu a thar vanglai niin an sawi.

Tualte tomato thar chhuahte hi tun dinhmunah a kharchhawngten a hmunah Rs. 55 hisapin an la a, Aizawl, Lunglei leh Champhaiahte an pe chhawng ve leh thin a ni.

Tualte khua hian kum 2019 atang khan tomato an ching tan a, tun dinhmunah tomato variety chi hnih, Arka Samrat leh Arka Abhed te chingin chhungkua 220 velin eizawn nan tomato hi an hmang mek.

Tualte hian nikum khan tomato quintal 14,100 vel an thar chhuak a, 2023 leh 2022-a tomato an thar chhuah an phak lo a, kum 2022 khan quintal 23,851 thar chhuakin 2023 khan quintal 15,000 vel an thar a. Kung 1,000 nei chin chu society-ah an tel thei a ni.