ZALEN June 6, 2024'; MNYF hqrs. chuan thuchhuah siamin, tourism minister Lalrinpuiin dan kalhin a minister pui pahnih a palzut niin an tarlang.

Thuchhuah an siama an tarlan dain, tourism minister Lalrinpuii chuan ama department subject pawh nilo Art & Culture dept. subject daih -music festival chungchanga a thutlukna siam mipui hmaah a puangchhuak a, chu chu Anthurium festival titawpa a aiah Leitlangpui Music Festival neih tur thu a puanchhuah kha a ni.

Tourism minister in Lunglei-a music festival huaihawt tur a sawi chu official a an hriatpui loh thu RTI zawhna an chhannaah Art & Culture dept. in ziakin an chhang tih tarlang bawkin, Allocation of Business Rules 2019 angin music hi tourism dept. subject list ah a tello niin an tarlang.

"Hetiang anih laia amah aia minister senior zawk C. Lalsawivunga, Art & Culture minister palzuta music festival chungchanga thutlukna a siam hi kalphung thar thalo tak a ni a, Val Upa Council (VUC) ten zilhhau vat se, he dan bawhchhiatna tenawm tak avang hian CM pawhin action a lak ngei kan phut a ni," an ti bawk.

Anthurium hi horticulture dept. subject liau liau a ni a, chuvang chuan a puala festival siam thin pawh hi tourism dept. leh horticulture dept. in tangruala an huaihawt thin a ni, an ti bawk a, tourism minister in horticulture minister, horticulture dept. officials leh Anthurium chingtu society (ZAGGS) te pawh rawn lova ama thu thua a titawp ngawt mai hi thuneihna hman sualna (misuse & abuse of power) chiang tak a ni, an ti.