July 28, 2022; Mizorama treasury lian pahnih, Aizawl South leh Aizawl North treasury te chuan bill dawng reng mah se, eng bill mah an pechhuak lo chhunzawm zel a, sum harsatna thleng mek hian sawrkar hnathawk hlawh a nghawng dawn leh dawn loh a la hriat loh.

ZALEN thu dawn danin, Aizawl North leh Aizawl South treasury atangin eng bill mah vawiin thlengin pekchhuah a la awm lo a, pay bill pass leh pass loh chungchang pawh treasury thawktute chuan engmah hriat an la nei lo. Pass theih a nih ve leh a pass tur erawhin an inbuatsaih nia thudawn a ni.

Treasury atanga bill pekchhuah a awm loh avangin vawiin lamah pawh treasury office ten dawrtu an nei tlem hle a, hnathawktu thenkhatte leh main gate a duty te pawhin a hma aiin dawtu an nei tlem hle tih ZALEN an hrilh.

Mizoram sawrkarin sum harsatna a tawh chhan hi sawrkar laipui thupek anga CSS sum pekchhuah vang a ni ber a, tun dinhmun ah treasury ten bill dawng reng mah se, sum pekchhuah lam chi reng reng erawh tithei loin an awm mek a ni.