ZALEN August 14, 2025: Aizawl Municipal Corporation (AMC) chuan Treasury Bazar – Mizoram rorelna sang ber, Mizoram Legislative Assembly ngheng maia awm hi a him tawh lo nia ngaiin March ni 17, 2025 khan a khar a. Mipuite tana kalna leh chawlh hahdamna hmun nuam tak siam turin ruahmanna a siam mek a, project mumal tak siamin, hna thawh tanna tur work order a buaipui mek a ni. 

Treasury Bazar a thu thin zawng zawng te hi AMC Multi-Complex Tuikual South ah thutna hmun nuam leh tha tak pek vek an ni a, sawn thlak an nih hian duh leh mamawh hrang hrang an nei a. Heng an harsatna leh mamawhte pawh hi AMC chuan a tihhlawhtlin sak thin a, Rs. Nuai 13 chuang a seng tawh a ni.

Hetiang a nih mek lai hian, tukin khan mi tu tih hriat loh ten Treasury Bazar hmun hluiah hian thutna hmun tur an sa a, thil zuar pawh an awm tih hriat a nih veleh a hmunah AMC in a enfiah nghal a. Mi 8 velin thutna tur an siam mek a, mi pakhatin thil a lo zuar tawh bawk a ni. Dan bawhchhiaa hma late hian an hming an sawi duh loh avangin tu nge an ni tih hriat theih a ni lo a, AMC thuneitute hemi chungchang hi rang taka ngaihtuah nghalin, insaseng nghal tura hriattirna (order) chhuah nghal a ni. Order ah hian dan bawhchhia a hma late chu tlai dar 3 hmaa insaseng a, an bungruate pawh senghawi nghal tura hriattir an ni.

AMC in Aizawl a chengte hma ngaia hma a lakna kawng hrang hrangah mipuiin an support tha hle in a hria a; lawmawm a ti takzet a ni. Hetih mek laia dan pawisa lo thenkhat ten dan kalha hma an lo la hi AMC chuan a dem takzet a, a tul angin hma a la zel dawn a ni.

Eitur thianghlim leh hrisel kan lei theihna tura Aizawl Municipal Corporation in hma a lakna hi lo thlawp a, AMC Market, Tuikual South a thil zuarte hi lo dawr turin AMC chuan mipuite a sawm nghal bawk.

#ZalenNews