ZALEN March 26, 2025; Aizawl Hmathlir Pawl (AHP) chuan, treasury square bazar kang ta chungchanga Venghlui Local Council leh All NGO Venghlui te hmalakna pawi an ti.

Vawiin Aizawl Municipal Corporation (AMC) Commissioner hnena lehkha an thehluh-ah he thu hi tarlangin, AHP chuan, treasury square bazar kang ta sawn chungchanga sawrkar hmalakna zawma kangmei tuarte pawhin thuawih taka bazar thar tur AMC Multi Complex a an insuan luh mek laia, Aizawl veng hlun ber zinga mi, Aizawl mawina leh zahawmna duh ber tura ngaih Venghlui LC leh All NGO Venghlui ten AMC thuchhuak kalh zawnga bazar tur an sa lui tlat chu mak an tih thu leh pawi an tih thu an tarlang.

AHP chuan treasury square bazar kang chu vanduaithlak an tih thu te, kangmei vanga sum tam tak chante an tuarpui thu te an tarlang bawk a, chutihrualin he lai hmun hi Aizawl hmun pawimawh ber lai, mawi leh zahawm taka buatsaih a tul em em na hmun a nih avangin, kangmei tuarte inzawrhna tur hmun dang ngaihtuah sakin, he lai hmunah hian bazar hi awm tawh lo an lo ti ve hle thin tih an tarlang bawk.