ZALEN March 17, 2025 : Venghlui leh Tuikual South Area-a awm Treasury Bazar tukina zinga kang chu bazar atana hman leh tura siam that tum a nih tawh loh tih AMC Mayor Lalrinenga Sailo chuan a sawi.

Vawiin chhun khan AMC Mayor bakah hian Tuikual South awmna ward XII bialtu Deputy Mayor R. Thanglura leh Venghlui awmna ward XVII bialtu David Zohmangaia bakah corporator engemaw zatin he hmun hi an tlawh a, he hunah hian thuthar thehdarhtute zawhna a chhan naah Lalrinenga Sailo chuan Treasury bazar mai bakah dan lova kawngsira inzawrhna te tihtawp a nih tur thu a sawi.

Mayor chuan Treasury Bazar chu timachin awm lovin khar rih a nih tur thu a sawi a, he bazar-a thute tan hian a thlang lawka AMC Complex, Tuikual South-ah an tan hmun a awm a ti a, Tuikual South huam chhunga kawngsira Inrinni-a inzuar thin te pawh inzawrh phalsak a nih tawh loh tur thu a sawi. Kawngsira inzawrh hrim hrim chu khap a nih thu Mayor hian a sawi a, phalna nei te aia dan lova inzuar te ten advantage an neih chu thil nihphung tur a ni lo a ti.

Chhinchhiah danin Venghlui area lamah dawr 53 a awm a, heng zinga 35 chu kang chhe zingah an tel a, Tuikual South lamah hian dawr 29 a kang chhe bawk a ni.