Aizawl: Election Commission of India (ECI) atanga thu hmuh a la nih loh avangin Tripura Relief Camp hrang hranga awm Bru-te chu Mizoram Electoral Roll atangin paih an la ni lo.

Sorkar laipui, Mizoram leh Tripura sorkar aiawh leh Bru aiawhten kumin January 16-a inremna lo ziah tawh ah chuan November 30, 2019 hnu lama Tripura Relief Camp-a la awmte chu an duhthlannain Tripura-ah an cheng hlen thei dawn a. Repatriation lo kalpui tawha Mizorama kir lehte tan erawh Tripura-ah let leh remtih a ni dawn lo.

Tripura sorkar chuan an state chhunga relief camp-a cheng mek zat chu enfiahna thar hlak siamin, resettlement kalpui a nih zawh hnu chuan heng relief camp-te hi khar tawh tur a ni.

Hemi chung changah hian thudawnna Mizoram Chief Electoral Office (CEO) hotute chuan Tripura Bru-te Mizoram E-Roll atanga paih turin ECI atanga instruction an la hmuh loh thu ZALEN an hrilh a, instruction an la hmuh loh chhan chu Covid-19 hri leng vanga thiltih zung zung a harsat vang a nih theih thu an sawi.

Kum 2018 Mizoram MLA inthlanpui neihah khan Tripura Relief Camp hrang hrangah Mizorama vote nei mi 11,987 an awm. Kumin Septembera neih Assembly Session-ah khan General Administration Department (GAD) changtu Chief Minister Zoramthanga chuan Lalduhoma zawhna chhangin Tripura-a Bru-te Mizoram E-Roll atanga paih tura dilna a la awm tih a lo sawi tawh a ni.

Hetihlai hian Mizoram Bru Displaced People Forum (MBDPF) General Secretary Bruno Msha chuan Mizoram E-Roll atangin paih fel ni tawhah an inngai tih ZALEN a hrilh.

Bruno Msha chuan tun hnaia an inbenbelna tur hmun selection an neihah Jampui Mizoten an dodalna hmunte telh a ni tawh lo tih ZALEN hrilh bawkin, selection an neih chu sorkarah thlenin, chumi anga ressetlement siam a nih an rin thu a sawi.