Aizawl July 23, 2024 : The Tripura Tribal Areas Autonomous District Council (TTAADC) in Sub Zonal Develpoment Officer (SZDO) hna lakna tur July 21, 2024 (Pathianni)-a exam a buatsaiha question number 75-na, 'Sikam' tih hi Tripura state-ah tute hnam nge tih zawhna a siama, he zawhna chhanna chu 'Halam-Kuki' tih a ni. He chhanna hi ZO Re-Unification Organisation (ZORO) chuan na a ti hle.

ZORO chuan, "'Sikam' tih hi Tripura-ah chuan tawngkam mawi lo, hnam inhmuhsitna tawngkam, hnam mawl, mi thah ching, hring ei hnam tihna a ni. Tripura sawrkarin Tripura state-a Zofate hmusit taka competitive exam a buatsaih a zawhna atana a hmang hi Zofate min hmuhsitna a ni. Tripura sawrkar kan dem hle a, Zofate chungah ngaihdam dil turin kan phut tlat a ni," an ti.

ZORO chuan July 16, 2024 (Ningani)-a Cachar District Assam state-a Hmar Thalai pathum te Cachar Assam police ten lemchanna hmanga mana rawng taka an that chu an dem a. Hemi chungchanga Zofa ten an thlavang hauha hma an lakna chu an thlawp tlat a, Assam sawrkara an thilphut zawng zawng tihhlawh tlin sak turin Assam sawrkar an phut a ni.