Aizawl: Kolasib district chhunga bungraw phur truck driver leh handyman ten Covid 19 an vei leh vei loh endik hna chu kalpui zel a ni a, nimin khan Covid 19 vei mi 1 hmuhbelh leh a ni.

Zalen in Kolasib DC Dr. H.Lalthlangliana hnen atanga thu a dawn danin nimin tlai thleng khan mi 555 test a ni tawh a, heng zingah hian Covid 10 positive mi 26 hmuh a ni. Health department thawktu te chuan driver leh handyman te hi an awmna ah kal chilhin ngawrh takin test hi an kalpui a, vawiin Pathianni hi chuan lirthei tangkhang driver leh handyman te hi test zawh vek hman beisei a ni.

Kolasib DC chuan naktuk Thawhtanni atang hian Vairengte ah lirthei lo lut apiang te hi test nghal zel tawh an tum niin Zalen a hrilh a. Nizan khan oil leh gas phur lirthei 20 chuang chu Aizawl lamah tirhchhoh an tum niin a sawi bawk a ni.

Zirtawpni khan ZMC Laboratory-a RT-PCR khawl hmanga swab sample test 146 zingah COVID-19 positive 5 hmuhchhuah a ni a. Kolasib District a Rapid Antigen Test (RAT) hmanga sample endik zingah positive 22 hmuh a ni bawk. Hetih lai hian Lunglei Civil Hospital Truenat PCR Laboratory-a sample test 24 a negative vek thung.

ZMC Laboratory-a COVID-19 hmuhchhuah tharte hi mipa 4 leh hmeichhia 1 an ni a, kum 27 - 41 inkara upa, Aizawl district-a mi 3 leh Champhai district-a mi 2 niin Assam Rifles 3 (Mizo - 2, hnamdang - 1) leh BSF sipai 2 an ni a. Assam Rifles te hi Assam atanga lo kir Quarantine facility a awm lai mek an ni a, COVID-19 symptoms an nei lo. BSF 2 hi COVID-19 symptoms an neih ve ve avanga ZMC-a admit lai an ni a. West Bengal atanga lo kir leh positive contact atanga kai an ni.

Rapid Antigen Test atanga COVID-19 hmuhchhuah zinga 22 hi National Highway-306 siam vanga Sethawn leh Thingdawl inkara bungraw phur Truck tang-khang khalhtu driver leh handyman te an ni a, anmahni atanga kai chhawng ni a ngaih Sethawn mipa naupang kum 12 mi a tel bawk. Kolasib district-a COVID-19 positive vei hmuhchhuah thar 22 te hi Polytechnic CCC, Thingdawl- ah dahluh vek an ni.

ZMC bulletin tarlan danin nimin khan sample 100 chuang test a niin a result hi nizan lam khan a chhuah beisei a ni a, he thu buatsaih lai hian result hi hriat hman a ni lo.