Goal 354 thuna Cristiano Ronaldo dawta Real Madrid tana goal thun tam ber, Karim Benzema chuan kum 14 zet a lo awm tawhna, Santiago Bernabeu a chhuahsan dawn ta a, a hmun ruak luahin tu nge a ballboot bun zui ta ang?

Los Blancos-a Ronaldo a awm ve lai kha chuan French striker hi a thlawptu ang deuh chauh kha a ni a, kum 2014-a Lyon atanga Spanish giants a pan hnuah season khata goal 21.3 chauh thun thin kha kum 2018-a Portuguese forward chhuah hnuah erawh season tin goal 32.2 thun ziah ang a ni ta a, a hmun ruak hi a zau dawn hle.

Ballon d’Or kawl mektu, Benzema-a boot bun thin thlaka Real Madrid No. 9 ni tura inrinsiak mek a ni a. A awm ve laiin Rodrygo chu a hnung chiah, ‘false nine’ tia sawi thinah khelhtir a ni ve thin a; mahse, ani hi a khelh duhna ber chu ding lam sir a ni a, No. 9 chu a nih zui a rinawm loh.

Tuna an sawi rik rin tak chu Espanyol target man Joselu a ni a, Catalan club hi tlakhniampui mah se league-a goal 16 zet thun thei a ni a, Madrid club-in Benzema thlaktu turin an it mek a, chiang thawkhat tawha ngaih a ni.

Mahse, Joselu-ah ringawt hian an lungawi kher lo vang, Frenchman kawr hak hnu ha tur chuan mi langsar a ngai.

Chelsea forward Kai Havertz bakah Italy-a Napoli champion-puitu Victor Osimhen leh Tottenham skipper Harry Kane te hming pawh a ri a. Liverpool chhuahsan tur Roberto Firmino pawh an sawi tel.

Heng zawng zawng karah hian an duh ber erawh a hma atang tawha an lo hel tawh, Kylian Mbappe a ni.

Nikum nipui lai khan Spanish giants hi hnarin Paris St-Germain-a awm zui a thlang tawh a, French khawpuia kum khat daih contract a la nei a, hman zawh a la duh bawk nia sawi a ni a; mahse, ram tana a khelhpui thin, Benzema a chhuah tak thut avangin ‘a duh hlah ngai lo’ tia an sawi thin, Real president Florentino Perez a awm mai mai kher lo vang.

Engmah chiang la awm lo karah hian thil chiang erawh pakhat a awm a. ‘Saudi Arabia-a sum tam tak hlawha kal tura sawi, Benzema aiawhtu tur hian Real Madrid hian centre forward langsar (big name) an la lut ngei dawn’ tih hi a ni.