Veng leh khaw bil inrelbawlna Village/ Local Council chu Covid-19 avanga tum hnih a hun pawhsei a nih hnuah Ningani (August 27, 2020) khan neih a ni a, inthlanna hian District Council lam huam tel lovin district dang pakuaah neih a ni. A tir kha chuan inthlanna hi village council 558 leh local councils 83-a neih tura ruahman a ni a, mahse, beisei angin kalpui a ni ta lo thung a ni. Veng engemaw zat chu hripui avang hian an inthlang thei lo a, inthlan huaihawtna veng-ah erawh beisei aiin vote thlak turin mi an chhuak tha thawkhat.

Tun tum tualchhung inthlan hi vote tla tha vak lo tura ngaih a ni a, chutihrualin beisei aiin vote thlak tur an thawkchhuak tha a, hei hi a chhan ber chu thalai lamin vote thlak an ngaihven vang a tih theih. Party tinin veng chhungmi thalai an vawrhchhuak tha tlang hle a, Kohhran thalai lama inhmang tak tak leh YMA lama inhmang tam tak te party hrang hrang aiawhin an penchhuak a, thalai te khawtlang inrelbawlna kawngah an harh thar a tih theih awm e. Chutihrualin MLA emaw MP thlan chu ni se, hetiang hi a thlen a rinawm loh niin veng pakhata Local Forum hruaitu chuan ZALEN a hrilh. "Inthlan dang chu ni se, kan tunlai dinhmunah hi chuan hetiang zat hi kan thawkchhuak ang em? tih hi zawhna awm thei a ni. Amaherawhchu tualchhung inthlan a ni a, kan unau, kan thiantha, kan thenawm pa te kha an ding fur mai si a, mipui pawh kan thawkchhuak tam lo thei lo a ni. Hei hi vote thlak tura thawkchhuak kan thahnem chhan niin ka hria," tiin a sawi.

Thalai ding an tam a, hei vang hian hripui leng karah pawh thalai ten an thalai pui vote tumin an thawkchhuak nasa a tih ngam. Veng leh khaw tam takah council member neih zat a inang lo a, voters neih dan pawh a inang lo zut a, candidate an tam lo thei bawk si lo nen vote thlak a muang lo thei lo a, hei vang hian vote thlak tura intlar pawh veng tin leh khaw tinah an thahnem a, social distancing pawh hman hleih theih a ni lo. Republic Veng a Local task Force hruaitu leh Locol Forum hruiatu pawhin social distancing kenkawh a harsat thu sawiin, "A buaithlak khawp mai. Vote thlak tur hi thui tak taka intlar a ngai a. Candidate an tam avangin vote a thlak zung zung theih loh a, a rei chuan lo awmkhawm pawl an awm hman zel a, tih ngaihna pawh a awm lo, han inhrilh thin mah ila awmzia a nei tam lo hle," a ti. Zalen in veng danga MPF hruaitu a biakna ah pawh a tirah chuan social distancing kalpui turin theihtawp chhuah mahse a harsa hle tih a sawi a, "A tirah chuan theihtawp kan chhuah a, mahse kan beisei aiin voters te an kal tha a, kan hmunhma ten a zir lo bawk nen social distancing kan kalpui thei lo a ni," a ti bawk.

Tun tum inthlanah khan AMC area bial chhunga Local Council inthlanah Kanan Veng, Aizawl tih lovah chuan party pathum MNF, Congress leh ZPM ten candidate an nei vek a, independent a ding awmna a awm nual bawk. MLA inthlana AMC area chhunga che tha tak ZPM chuan Local Council pakhat chiah an chang a, Village Council inthlanna lamah pawh seat lak an nei nual a, chutihrualin rorel lai MNF lamin inthlan an thunun hle a tih theih.

Tun tum inthlana thil langsar tak pakhat chu 'vote thi tam lutuk' kha a ni. Council inthlanna ah hian general seat (mipa) leh reserve seat (hmeichhia) chuan ballot paper an nei hrang a. General seat tan ballot paper var leh reserve seat tan ballot paper sendang hman a ni a. Mipui ah inzirtirna a awm that tawk loh (?) avangin mi tam tak chuan mipa leh hmeichhia te a hranga vote tur a ni tih hre lovin mipa thlanna tur ballot paper var a lo vote vek te an awm a, candidate te arrow crossmark hmanga vote tur an nih laiin pen hmanga lo thai an awm bawk a, hei vang hian tum dang zawng aiin vote thi a tam nia thudawn a ni.

Inthlan zawh takah khan village council 558-ah voters 4,54,180 a awm a, Local council 83-ah voters 2,18,758 an awm thung. Village/Local Council term hi May 7, 2020 kha a tawp hun tur a ni a, vawi hnih pawhsei tawh niin tuna an pawhsei hian September 7, 2020 thleng hi a huam dawn a ni. Heng Veng/Local Council te hi term kalta atang khan term khat hi kum 5 a ni a, a hma kha chuan term khat hi kum 3 a ni thin a ni.