July 29, 2023; Myanmar raltlan, Khawbung a awm mek chu tual a thah vangin damchhung tang tura hrem a ni.

Thudawnna Champhai Cable Networkn(CCN) in a tarlan danin, Hrangthanchea (38) Hnahthial, Falam District Myanmar, Khawbunga khuaa raltlan awm mek chu khawchhak sumdawng Ngokhandova thattuah puh a ni a, puh a nihnaah evidence hrang hrang atangin Hrangthanchea hi Court chuan thubuai pahnihah thiam loh chantira, nimin khan a hremna hi tichhuakin, Hrangthanchea hi rim taka hnathawk chunga dam chung lung in tang tur leh Rs. 10,000 chawi turin a hrem a, a pawisa chawi tur hi a pe tla thei lo a nih chuan thla 2 dang a tan belh leh dawn a, hei bakah hian finfiahna tibo tura ruang a thuhruk avangin kum 3 Lung in tang tur leh Rs. 5,000 chawi turin a hrem bawk a, a pawisa chawi tur hi a pe thei lo a nih chuan thla 2 dang a tan belh leh dawn bawk a ni.

Dam chhung lung in tang tura hrem Hrangthanchea hian kum 2022 khan khawchhak sumdawng, Ngokhandova, Langzang Myanmar hnen atangin Thingzaina khawl chu Rs. 35,000-in a lei a, Rs. 20,000 pein a bak zawng a bat sak a, kum 2022 August ni 13 khan Ngokhandova hi a leiba thing turin Hrangthanchea inah hian a kal a, a inring lo lai chu Hrangthanchea hian Tuboh-in vawi eng emaw zat chhu a, a thih thlengin a nghawngah a rap bet zui bawk a; a thah hnu hian a ruang chu tukverhah thehchhuakin a thlang tuikawrah a thukru zui a, a thiltih dan hi hmu rutu an awma a hriat avangin Khawbung khawtlang hruaitute hnenah a inpe a, Dungtlang Police-te chuan an man zui ta a ni.