ZALEN June 9, 2025: Chief Minister Lalduhoma chuan vawiin khan Irrigation & Water Resources Department Auditorium, MINECO ah World Bank suma din Mizoram Water Informatics Centre leh Tlawng Lui lian tur hriatlawk theihna (Tlawng lui Early Warning System) chu a hawng a. He system hi DM&R department nena enkawl tur a ni.

Chief Minister chuan, "Hmun 82 atanga tui data chi hrang hrang, darkar tina min hrilh hre thei centre changtlung tak kan ta hi thil lawmawm leh scientific lama kan ram hmasawnna chhinchhiahtlak a ni. Hetiang centre changtlung kan lo neih tak avangin, tui lam data mamawhtu department leh institution ten he centre hi ring tlang ila, data thuhmun hmangin hna thawk ila a tha hle ang," a ti.

National Hydrology Project hnuaia National Water Informatics Centre chuan state zawng zawng mamawh min phuhruk zo lo va. State Centre lo neih theih hi central sawrkar lam duh dan a lo ni bawk nen, he centre din hi kan remti ta a. Sum leh pai hi World Bank lamin an tum a ni, a ti.

Chief Minister hian, "Data dik leh rintlak neih chu project rintlak siam tura kan mamawh hmasa a ni zel a, tuiah chauh ni lovin thil dangah pawh data dik nei turin department te ka chah thin. Budget kan pharh pawhin data dik tak hmang turin thawktute ka hrilh. Kan lan danah kan lo tlahniam deuh a nih pawhin kan dinhmun dik tak hriat tluka hlu a awm lo. Data dik kan neih hian kal dan tur dik kan duang chhuak thei dawn a, data dik lo behchhana project siam chu dawt rinchhana thusawi ang tho a ni," tiin data dik neih a pawimawhzia pawh a tarlang a ni.

Chief Minister hian Tlawng lui lian tur hriatlawk theihna (Tlawng lui Early Warning System) hi DM&R department nena enkawl tur a ni, darkar 24 hma-in he khawl hian warning a pe dawn a, Lunglei, Buarpui, Darlung, Sihhmui kai, Sairang kai leh Bairabi-ah te bun a ni.