June 29, 2023; Vawiin chawhma dar 10 bawr vel khan Kawlchaw West balu kai ah tleirawl pathum tuiah an tla a, pahnih chhanchhuah an nih laiin, Vanhmunropuia (14), Lawngtlai College veng chu he chanchin ziahlai thleng hian hmuh a la ni lo.

ZALEN thudawn danin, Lawnglai College veng mi vek Andrew Lalramluahpuia (15),  C. Lalduatsanga (14) leh a ruang zawn mek Vanhmunropuia te chuan balu la an zui a, chuta tuia an cheng chu a thiante pahnih chesualin tuiah an tla a, Vanhmunropuia chu chhan a tumna lamah a chesual ve leh a ni. Midang pahnihte chu an bulhnai a lo awm Jonathan Lallianzauvan a chhanchhuak thung.

Vanhmunropuia chu he chanchin ziahlai thleng hian hmuh a la ni lo a, an tlakna lai hi balu la ten thuk tak taka an haikhuarna hmun a ni.

Lawngtlai leh Kawlchaw West lamin tui tla zawn hna hi ngawrh takin an thawk mek a, zanin lamah pawh tlaivar a zawng turin ruahmanna an siam niin Kawlchaw West atanga ZALEN thudawnna chuan a sawi.