Aizawl September 12, 2023: Tui tla avanga nunna chan an lo tlem zawk nan leh mipui an lo him zawk nan "State Level Seminar in Accidental River Drowning Incidents" neih a ni a, he hunah hian tui tlak hi disaster-ah rinluh a nih lo avangin zangnadawmna (ex-gratia) pek theih a nih loh thu tarlan a ni. 

Seminar a tarlan angin nitin chhuak chanchinbu thenkhat atanga report lakkhawm atangin kum 2011-2021 chhung khan tui tla avanga nunna chan mi 300 chuang awm anga chhinchhiah a ni a, an zingah kum 21 atanga kum 40 inkar an tam ber a ni. World Health Organization (WHO) chuan kumtin tui tla avangin khawvel pum ah mi 3,60,000 thi thin niin an chhinchhiah a, chung zinga a zatve chu kum 30 hnuailam an ni. 

India ram bikah chuan National Crime Records Bureau in a chhinchhiah danah nikum 2021 khan rampum a tui tlak avanga nunna chan chu mi 36,362 an ni thung. Disaster Management Division, Ministry of Home Affairs chuan tui tla chu disaster ah a rin luh hleih theih loh avangin chhiatna dang thenkhata ex-gratia pek thin kha tui tla ah chuan sawrkar atang chuan a pek theih rih loh a ni.

Seminar hi Quick Response Team, Aapda Mitra, YMA leh Centre for DM, MZU te tana a buatsaih a ni. He hunah hian Home, DM&R etc. Minister Lalchamliana chu khuallian niin, district hrang hrang atangin seminar chhim tur hian an kalkhawm a ni.