ZALEN July 21, 2025 : Hachhek MNF Joint Block chuan thuchhuah siamin Tuidam leh Darlak inkar kawng chhiat zia leh he kawngchhia avanga Khawthlang mipui bakah Mizoram pumin rei tak a tuar tawh tih a, hetihlaia a helai kawng siam nana Cheng nuai 20 chauh ruahman a ni thu mak an tih thu an tarlang.

Hachhek MNF Joint Block chuan, "ZPM sawrkarin Vantawng bula Ropeway siamnan Cheng nuai 3450/-dahin Thenzawl khawpui DPR siam manah Cheng Nuai 1000/-a ruahman bawk laia State pahnih inkalpawhna kawng chhe lutuk siam nan a 'Cheng Nuai 20 chauh' a ruahman hi mak kan ti tawp theilo a ni," an ti.

He kawng hi state PWD mawhphurhna anih angin midang puhmawh lovin sum tam zawk hmangin rang taka siamtha vat turin Mizoram PWD Minister leh Sawrkar an phut.

Hachhek bialtu MLA Robert Romawia Royte-a'n a hmuna a endik hnuah Mizoram sawrkar hotute, MORTH hotute leh Mizoram Governor thlengin siamthat vat anih theihnana hma la turin a ngen kha tha an ti a, full support an pe tih an tarlang.

Hachhek MNF chuan Governor-in chet a lak hnuah Mizoram PWD Minister Vanlalhlana’n a hmun a tlawh chu lawmawm an ti a. mahse, a hma atanga PWD hotuten an hrilh tawh 'Cheng Nuai 20' chauh bawk a rawn puang erawh hi chuan mipui a tilunghnur a. He sum hi PWD-in cheng nuai 20 an ruahman an tih tho kha anih phei chuan a zialo dawn hle a ni an ti bawk.