Aizawl: Darzokai-a Tuipui D lei chu Ningani kalta khan rod phur Pick-up in a chhuat a zawh pawp a, lei chhia thawmthat hna hi PWD te chuan a rang lama thawh an tum.

Lei chhia chung-changa Hnahthial chanchinbumi te zawhna chhangin PWD thawktute chuan, “Lei chhuat thenkhat thlak tur hian hmalak mek a ni a, thingzai kan order a, zai zawh vek tawh niin a thiar chhuaktu tur an la awmloh avangin an la rawn dah thei lo a. Chutih laiin hmun thenkhata thingzai kan hmuh te pawh kan lakhawm a, kan thlak thuai ang” a ti. Lei chhuat zawh pawp a ni chu a chhiat leh mawih tawh vang hrim hrim a nih loh thu sawiin, “Ruahsur nal avangin motor in a rah tur lei chhuat dawh pawn chu rap pial palhin thingpek khamphei a zuk rah palh khan double a nih bawk si loh avangin a tliak ta mai a ni, hetiang hi chu tun tumah lo pawh hian a awm zeuh zeuh a, a khat tawkin kan thlak thin a ni” a ti bawk.

Tuipui D lei hi Ministry of DoNER sum Rs.nuai 311.237 sengin S.Guha Niyogi & Associates, Engineers & Contractors Kolkata ten kum 2012 tawp lam khan an dawh tan a, Nov. 18, 2013-ah zo fel tura ruahman a nih laiin Dec.3, 2014 khan lei khaitu thlunna hruipui chu a put avangin a chim a, hnathawktu hnamdang pakhat chuan nunna a chan a. Lei dawh hna hi Sept.27, 2016 khan zawh fel a ni.