Aizawl : Nimin zing dar 7 atanga tlai dar 6 inkar chhung khan 4th Tuirial Assembly Constituency MLA by-election chu tluang taka vote thlak a ni a, hriattheih chinah vote tla hi 81.29 % a ni a, vote tla te hi November ni 2,2021 (Thawhlehni) hian Govern- ment Kolasib College ah chhiar a ni ang.

ZALEN-in Tuirial bial chhunga mi hrang hrang a biaknaah vote thlak hi tluang taka neih a ni a, khawi hmunah mah buaina liantham chhuak a awm lo a ni. Tuirial Assembly bialah hian polling station 27 a awm a, heng zingah hian Hortoki leh Zodin-ah te Bru voters 663 an awm a, hengte hi Hortoki Polling Station-ah voter 176 leh (Rastali)-ah voters 487-te an ni a; mahse Bru-te hian vote an rawn thlak lo a ni. 

Election thuneitute ruahman dan chuan Tripura-a Bru tlanchhia te zingah Vote thlak tura lo chho an awm anih chuan Kanhmun ah Mamit Sub-Hqrs YMA hruaituten an lo hmuak ang a, YMA hruaitute kaihhruaina hnuaiah lo chhoin Meidum khuaah chaw eitirin, heta tang hian an vote thlakna turah hruai an ni ang a, polling station an thlen veleh mi dang aia hmain vote thlaktir an ni ang a, an thlak zawhah an chenna lamah hruai kir leh nghal anni ang. Tuirial Assembly bialah hian voter 17,911 an awm a, hengte hi mipa 8,819 leh hmeichhia 9,092 an ni. Polling station zingah Tripura-a awm mek, Bru-ten vote an neihna Zodin leh Hortoki-II te chu venhim ngai bikah ngaih a ni.

Tuirial biala vote tlate hi November 2, 2021 zing dar 8 atangin Govt. Kolasib College ah chhiar tan a ni dawn a, dawhkan pasarih awmin vote tlate hi round lia chhiar a ni dawn a, chawhnu lamah chuan result kimchang hriat theih beisei a ni.

Tuirial bial inthlanah hian candidate 4- K.Laldinthara (BJP), Chalrosanga Ralte (INC), K.Laldawngliana (MNF) leh Laltlanmawia (ZPM) te an awm a ni.