ZALEN August 15, 2025; PWD minister Vanlalhlana'n tun atanga rei loteah chuan kawngpui tha tak kan neih theih ngei a rinawm tih a sawi.

Vawiin chawhma dar 9:00 khan Kolasib Sports Stadium, Project Veng-ah Independence Day vawi 79na chu ropui taka lawm a ni a. Vanlalhlana, PWD Minister chu Khuallian a ni a, hnam puanzar pawt pharhin Parade Contingent-te chibai a chhang let.

Khuallian chuan he hunah hian thusawiin, Mizoram chief minister zahawm tak Pu Lalduhoma kaihhruaina hnuaiah ZPM sawrkar chuan theihtawpin ram chhung mipui tan hna a thawh thu a sawi a. “Langtlang Sawrkar kan nih ang takin inrualkhai taka hmasawnna lamtluang kan zawh theih nan sawrkar chuan theihtawp a chhuah a ni” a ti.

PWD minister chuan tunhnaia Kolasib district-a National Highway 306&06 kawng that tawk lohna avanga kawng siam leh thawmthat hna thawh mek chu sawrkarin a ngai pawimawh takzet a ni a ti a. He kawng siamthat nan hian chief minister, MLA leh minister dangte leh amah ngei pawhin National Highway Authority-a an hotute leh Central lama thuneitute chhum lo chat lovin a theih ang angin an biak pawh reng thu leh a hmunah ngei kalchilhin kawng siam hna hi chawl lo turin an nawr zel thu a sawi a. “Tun atanga rei loteah chuan kawngpui tha tak kan neih theih ngei a rinawm” a ti bawk.

#ZalenNews