Aizawl: Air India chuan tunkar Thawhlehni atang hian Lengpui ah thlawhna a service tir tan beisei a ni.

Zalen palaiin Principal Consultant Aviation J.Lalhmingliana hnen atanga thu a dawn danin Air India in ruahmanna a siam angin tunkar Thawhlehni atang hi chuan Kolkata-Lengpui-Imphal chu thlawh tan tir an beisei tih a sawi a. "Air India lam atangin an thulh thu kan la dawng lo a, chuvangin lokal turah kan ngai a, kan beisei phawt a ni," a ti. Ruahman dan chuan kar khatah ni 3, Thawhlehni, Nilaini leh Ningani ah te thlawkin Kolkata atangin Lengpui ah lo tumin Imphal a pan ang a, heta tang hian Kolkata ah a let leh thin dawn a ni.

Tun dinhmunah Air India bak airline dang service an la awm hrih dawn lo a, Kolkata nen a inkarah a thlawk ang a. Guwahati lam chu engtikah nge a service ang hriat a la ni hrih lo. Kolkata-Aizawl thlawhna service hi ruahmanna hmasa ah chuan May ni 26 atanga neih tan tum a ni a, mahse cyclone in West Bengal a nuai avanga Kolkata airport pawh thuam that a ngaih avangin ruahmanna hmasa angin thlawh tir theih a ni lo a ni.

Hetihlai hian nimin khan Indigo Flight pahnih chu Lengpui Airport-ah hian a rawn tum a, heng flight a chuang te hi Kolkata leh Mumbai-a damlo tangkhangte niin Mizoram sawrkarin a bik taka a thlawh tir an ni a, flight pahnihah hian passenger 78 ve ve an chuang a ni.