- Dikteii Hnamte

April ni 17 atanga ni 20 chhung khan Mamit leh Zawlnuam velah hna pawimawh tiin kan zuk teihawi a, khua a lum tia Aizawla kan lo iak kan lo iak ve te hi chu ‘kan va phunchiar em!’ tih mai a awl rum rum mai. Zawlnuam college a hun kan hman ni phei chuan luhai burin khawlum kan tuar kha a ni a!

Khawlum zia leh hnathawh thulh lova rim taka hnathawk kan hmuh chungchang leh thildang chu tun tumah hian ka  ziak chipchiar dawn rih lo!

Kan lo hawn kawngah chuan miin Tut chengkawl a tui tih an sawi ka hriat avangin lei ngei ka tum a. Thenkhatin ‘Aizawla Tut chengkawl an tih zawng zawng hi a ni vek lo’ te an tih leh zel avangin a hmun ngeiah chuan hmundanga mi an lak a rinawm lo nen, kei, chengkawl ei ngai reng reng lo hian lei ka tum ruh ve tlat (kan chhungkhat hnai, chengkawl duh, hawn tur an awm nual tlat alawm).

Mamita kan innghahna, Tourist Lodge a lo awmte khan a tung chu lei sual a awl an tia, a bial lei turin thutlukna ka siam a. Dapchhuah bazar kan thlen chuan chengkawl zawrhna lam chu kan pan ding nghal vat a. Heta ka thil tawn hi a ni, ka rilru khawih em em, sawi loh ka phal loh chu ni…..

Zin hawn kawnga chawhmeh lei hi ka uar viau a. A huho deuha thute hi chu dawr kim ngei ka duh avangin ka thlang kual thin. Hemi ni pawh hian chengkawl zuar chu a bial te te (ka ti mai) in an lo thu a. Kan pante chu 3 an ni a, no 5 cheng zahnih an lo chhiar a. Cheng zahnih man theuh a suak turin an pathum chuan ka hrilh a. Kho pakhat, buara huha la inkhuh hi a awm bawk a. Pakhat chuan a’n suak dawn uk a, mahse suak ta lo chuan a thiannu, an bula awm hnai lo pakhat chu ring zet hian a kova, “Hei, chengkawl hi no 5 rawn suak rawh, i la inhralh si lo ka kian ang che” a ti ta anih chu. Ropui hi ka va han ti tehlul em!

Keini hian rim taka kan thawh hnua a hlawkna kan dawn ve dawn tepa kan hlawkna tur hi, keini tluka thawkrim, kan dawn ang dawng ve phak chiah lo tur hi kan kian tawh em? Kei hian khatiang kha ka tih ka hre hauh lo mai. Khawthlang lam, tun boruaka a lum zia kan hriain ka ring. Thlan tui tlain an thawk chhuak a, kha nu, a thiannu kian ta khan a chengkawl zawrh kha hralh zawh thuai a ina hawna chawlh hahdam hlan kha a thlahlel ve lo thei lo. Mahse ani aia la inhralh tlem kha a dinhmun hrethiamin a kian phal tlat. Mi tamtak chuan cheng zahnih man lek inken kha ho kan ti viau maithei. Mahse an dinhmuna kha pawisa hlutzia kha - vaibelchhe neitu tana vaibelchhe man engemaw thiante tana zuah/ken nen a danglamna kei chuan ka hmu lo.

Kha Dapchhuah nu (a nih ka ring ringawt a) khan a thiltih ropui zia kha a chhut si se in ka ring lo. A chhan chu rilru ngil leh tluangtlam tak ani tih a thiltih khan a sawifiah tlat. Chengkawl no 5 hralhna a kian satliah a ni lo, a chan tur, a nghahhlelh ve em em a kian tlat.

Hawn kawng tluanin ‘engatinge kei khan no 5 dang ka lei belh mai loh? Midang pek tur an awm tho dawn asin’ tiin sawt lo takin ka inchhir a!

Tlemte chunga kan rilru puthmang hian tamtak chunga kan rilru tur hi a tilang ngeiin ka ring. Zirchhuah tur ka hmuh ang hi chhiartuten lo hmu ve ula tih ka va duh em!