Best Fifa Football Awards chu Thawhtanni tlai hian London khawpuiah sem chhuah a ni dawn ta a. India-a zanlai (Thawhlehni zing) dar 1:00-ah sem inkhawm hi tan a ni ang.

Mipaah Erling Haaland, Kylian Mbappe leh Lionel Messi te chu a dawng thei tura chhawp chhuah pathum an ni.

Hmeichhiaah World Cup-a che tha, Aitana Bonmati, Linda Caicedo leh Jennifer Hermoso te chu dawng thei tur an ni bawk.

Chawimawina dawngtu turte hi national team player leh captain, chanchinbu mi leh Fifa website-ah fan-ten an thlang thin a, hengho vote hlut zawng hi 25% theuh a ni a, mipa leh hmeichhiaah best coach leh goalkeeper thlan an ni bawk ang.

Hungarian legend Ferenc Puskas-a hming chawia siam, Puskas Award chu pundit-ten a dawng tur an thlang dawn thung a, hei hi goal tha (mawi) ber thuntu hnena hlan tur a ni.

Fifa Best award hrang hrangte hi kum khat (calendar year) chhunga che thate hnena hlan thin a ni a, season khata chet dan mila pek thin, Ballon d’Or nen a inang lo.

Kuminah erawh kum 2023 chauh en lovin mipa bik leh Puskas Award hi December 19, 2022 leh August 20, 2023 inkar teh nan hman a ni a, hei hi nikum hmasa kum tawpah Qatar World Cup zawh chauh a nih vang a ni.

Hmeichhe chawimawina hi August 1, 2022 leh August 20, 2023 inkara chet dan atanga hlan tur a ni thung.

Fan leh fair play chawimawina sem a ni dawn bawk a, mipa leh hmeichhe World XI puan a ni bawk ang.

MIPA

Nikum khan world champion leh tuna Ballon d’Or kawl mektu, Messi-a’n Manchester City striker Haaland leh Paris St-Germain-a a khelhpui thin, Mbappe khumin a lo dawng tawh.

Award kha World Cup zawh hnu lawkah sem a ni a, Messi-a hian PSG tan goal kua thunin French champion a nihpui a, a club thar, Inter Miami tan vawi sarih inlanah goal 10 thun nghalin Leagues Cup-ah a champion-pui nghal bawk.

Haaland hi Manchester City-in Champions League, Premier League leh FA Cup an lak theih nana mi tangkai ber a tling.

Kum 23 mi, Norway striker hian season liam taah Premier League-ah goal 36 a thun a. 2022-23 season pumah club record siamin goal 52 a thun a, heng zinga 28 hi World Cup hnua a thun a ni nghe nghe a. August 20 hma, tun season-ah goal hnih a thun leh tawh bawk.

France striker Mbappe hian Messi ang bawkin Ligue 1-ah PSG a champion-pui a, a zawnin vawi nga nan Golden Boot a dawng bawk.

Kum 25 mi hian chawimawina sem tur teh hun chhung hian French club tan hian goal 18 a thun.

HMEICHHIA

August 1, 2022 atanga Women’s World Cup final ni, August 20, 2023 inkara chet dan hmanga teh a ni.

Nominee pahnih, Bonmati leh Hermoso te hi Spain midfield-a mi pawimawh niin England hnehin Australia-ah World Cup an la.

Kum 25 mi, Bonmati-i hian Uefa Player of the Year niin Ballon d’Or a dawng bawk a, Barcelona chu Spanish leh Champions League nomawi a lakpui bawk.

Kum 33 mi, Hermoso-i thung hi Mexico-ah club football a khel a, tun hnaiah Pachuca atangin Tigres a zawm a. World Cup-ah goal thum thunin vawi hnih a siamsak bawk.

Chhawp chhuah dang, kum 18 mi, Colombia forward Caicedo hian season hmasa khan Deportivo Cali atangin Real Madrid a zawm.

Under-17, Under-20 leh senior World Cup a khel vek a, Germany laka hnehna an channa goal a thun chu goal of the tournament atan thlan a ni bawk.

CHAWIMAWINA DANG

Puskas Award dawng tur hian Julio Enciso, Guilherme Madruga leh Nuno Santos te chhawp chhuah an ni.

Mipa coach tha atan Manchester City boss Pep Guardiola, Inter Milan manager Simone Inzaghi leh Serie A-a Napoli champion-puitu, Luciano Spalletti te chhawp chhuah an ni.

Hmeichhia-ah England boss Sarina Wiegman, Chelsea manager Emma Hayes leh Barcelona coach Jonatan Giraldez te chhawp chhuah an ni thung.

Mipa goalkeeper tha ber dawng turin Manchester City keeper Ederson, Real Madrid Belgian si nghak, Thibaut Courtois leh Sevilla goalkeeper hlui, Yassine Bounou te chhawp chhuah an ni.

Hmeichhiaah England keeper Mary Earps-i chuan Spain keeper Catalina Coll leh Australia keeper Mackenzie Arnold te a el dawn a. An zavai hian World Cup-a che tha tak vek an ni.