Social media lian thununtu pahnih Elon Musk leh Mark Zuckerberg te chu kawng hrang hrangin an inbei zui zel dawn a nih hmel. Meta chuan July 5, 2023, Nilaini khan Threads an tlangzarh a, internet khawvel a deng chhuak rang hle. Threads hi hmangtu an pung chak hle a, American YouTuber MrBeast chu follower maktaduai khat nei rang ber a ni. 

Threads app chu...
Threads hi online social media leh social networking service niin, American technology company Meta Platform a ni. He app hi Twitter nen an function dan a inang a, thu leh link a post theih a, thlalak leh video a post theih bawk. iOS leh Android-ah a hman theih ve ve a, Instagram account hmanga log in mai tur a ni. Instagram nen hian an inngheng a ni ber a, username leh thil dang intawm theih an nei nual. 

Khawvel pumah Instagram hmangtu mi tluklehdingawn 2 vel awm anga chhut a ni a, chung zinga maktaduai 10 vel chuan Threads hi an hmang thuai tura beisei a ni.  

Threads hi hi ram 100-ah hman theiha chhawpchhuah nghal a ni a, chung zingah chuan India pawh a tel - Mizo zingah pawh hmang an tam leh tawh viau. Tawng chi hrang 31 a awm a, mi aktaduai 100 dawnin an hmang der tawh nia tarlan a ni. 

MrBeast  
American YouTuber hi mimal zinga follower maktaduai khat nei thei hmasa ber a ni a, hming a lo chher leh hman der tawh! Hetih rual hian Instragam leh National Geographic te chu follower maktaduai khat nei rang ber an ni a, mimalah chuan MrBeast hi record siamtu a ni thung. 

MrBeast hian Threads-ah hian fiamthu a thawh zui nghal a, a bio-ah pawh 'Future Threads CEO' tih a dah. MrBeast hi social media-ah a chena hle a, Instagram lamah pawh follower maktaduai 38.5 zet a nei a, YouTube-ah subscriber maktaduai 165 zet a nei bawk. 

Hei mai hi a la ni lo, MrBeast hian Guinness World Record a siam nual a, chung zingah chuan kum 2021 khan YouTube atanga sum lalut hnem ber pawh a tel. Kum khat chhunga a sum lakluh hi $mtd 54 zet a ni a, mipa zinga YouTube-a subscriber ngah ber a ni bawk. 

Twitter-in Threads an vau nghal!
Twitter chuan Threads app lakah legal action lak an tum thu an puang nghal rup mai. Hei hian boruak a rawn siam nghal hat a, a neitute sawi luh loh theih an ni lo. Twitter CEO Elon Musk chuan, "Inel chu a tha e, inruk sak erawh a tha lo," tiin, Mark Zuckerberg chu Threads app an siam danah Twitter entawnah a puh. 

BBC News technology reporter James Clayton chuan Threads hi Twitter nen a inang a tih thu a sawi a, news feed leh reposting phei chu a inang hle tih a lo sawi ve mek bawk.  Hetih lai hian US copyright law chuan idea inruksak hi a khap lo nia sawi a awm a, Twitter hian khing pawh nise hnehna an chang kher ang em tih chu zawhna awm mek a ni. 

Elon Musk vs Zuckerberg
Anni pahnih hi social media thununtu tih hiala sawi theih an ni a, an boruak pawh a lian hle. Elon Musk hian manto takin Twitter a lei a, thuneihna a chan hnuah danglamna tam tak hmuh tur a awm nghal bawk. Twitter CEO hian Twitter hmangtu tam zia a hria a, sum thehchhuah a ui lo. 

Hetih lai hian Meta CEO Mark Zuckerberg hi a theuneu lo khawp mai - Facebook, WhatsApp, Instagram etc. thununtu a ni a, a huhang pawh na mai lo tak a ni. Hengtiang khawpa thil tithei pahnih hi kawng hrang hrangah an intlaksiak a, am boruak pawh a ri leh hat thin. 

Tun hnai khan khawvela hausa ber nihna dinhmun luah mektu Elon Musk leh Mark Zuckerberg te hi social media kaltlangin an incho tawn a, cage-a insual hial an duh! Kum 51 mi Elon Musk hian Twitter kaltlangin Mark Zuckerberg chona thu hi a chhakchhuak hmasa a, hei hi Zuckerberg chuan lo hmuin, "A hmun tur rawn sawi rawh," a tive nghal riap.    

An inkar boruak tang tak karah Meta lam hian Elon Musk thuhnuia awm Twitter eltu tur Threads an rawn duang chhuak a, rin lawk ang ngeiin boruak an rawn nei leh nghal. An inkar boruak hi a that mai a rinawm loh a, sum an ngah bakah thil tithei tak an nih avangin an innghirngho chho zauh zauh dawn niin a lang.